Ang orasyon ni Tibong batok sa mga mangtas

Ang amahan ni Tiburcio nga si Saturnino maoy giilang  labing banggiitang albularyo dinhi sa balangay sa Tubaon. Matud pa dunay orasyon si Ingko Saturnino gawas sa iyang mga tambal nga mga gamot sa kahoy nga iyang gilana ug gisulod sa mga garapa. Naliwat si Tiburcio sa iyang amahan.

"Tanciong kagabii ba, dunay nangaskas sa bungbong. Ug unya didto na pud sa atop," ni Sonya pa ngadtong Daniel nga iyang bana.

Nangaskas, uy, kun mao na, basig ungo to, Son," ni Daniel nga migabling sa iyang asawa nga nagsabak sa ikaduha nilang anak.

Unya, pagkabuntag may balita nga si Tokles gibalbal. Patay na kini nga nakit-an diha sa ilang hagdanan. Ug tungod niini, ingon sa napikal si Tiburcio. Busa, nagpalibot siya'g tabi nga adto siya makigtagbo sa mangtas sa tampi sa lugot duol sa nasunog nga payag. Tuod, pagka gabii, nag-una si Tiburcio didto sa may tampi sa lugot ug didto wala dangti'g dugay mitumaw ang mangtas nga ungo. Lingkaang ang buhok niini ug tag-as ang mga tango ug laksot kaayo ang nawong. Misugod dayon si Tiburcio sa iyang orasyon panguntra sa ungo nga maoy gibilin kaniya ni Ingko Saturnino. Bedri, Bedri, Mundona, Satanas, encarnatus, badiritruss... miwarawara sa iyang tuo nga kamot si Tiburcio agi'g pasiuna sa iyang giyawyaw nga orasyon.

"He, he, he, Tibur, parehas man ta ba, duna tay orasyon. Ang imong orasyon, mao say ako. Igsuon man ta ba kay anak man ko sa gawas ni tatay Saturnino. Ang akong inahan mao si Soling nga tinambalan ni tatay Saturnino. Ug iya pud kong gibinlan ining orasyon, he, he, he.." Ug mibahakhak ang wakwak.

"Ako diay si Patricio. Basta, dili lang gyud ta magsangka. Igsuon gud ta. Sige, Tibur, adto na ko, kay mangabat pa ko didto sa pikas baryo."

Ug milupad si Patricio mangtas. Dinhi ingon sa nahisagmuyo si Tiburcio kay ang mangtas nga iyang gihagit iya man diay'ng igsuon, anak sa gawas sa iyang amahan. Guwatsinanggo diay to si tatay niya Saturnino da ug nakapahiyom si Tibur. (Kataposan)