Mutya sa tindahan

Dugay nang may pagbati si Wilson kang Lalaine. Puliki kaayo si Lalaine sa pag-atiman sa iyang mga suki sa tindahan.  Kini tungod sa maayong mga hiyas nga iyang gipakita sa iyang mga suki. Mao nga gabii na kaayo manira sa iyang tindahan, ug wala na siya'y panahon sa pagpamisita sa dalaga.

Nanagana usab siya sa pagpadayag sa iyang gibati sanglit kanunay niyang mahinumdoman ang iyang gibuhat ni Lalaine sa high school pa sila. Kanunay niyang bugalbugalan si Lalaine.

Gani, gumikan sa iyang pagbugalbugal gilabay siya sa sapatos niini. Natapos lang ang iyang pagbugalbugal kang Lalaine sa dihang natapos na usab ang ilang pagtungha.

Karon wala niya damha nga ang babaye nga iyang gibugalbugalan kaniadto mao na hinuon ang natingban sa iyang pagbati. Karon naglibog siya kun unsay iyang buhaton, aron iyang ikapadayag ang iyang gibati. Unsa kahay reaksyon ni Lalaine niini? Usa ka gabii niana, mingaw na ang kagabhion, nakahunahuna si Wilson nga haranahan si Lalaine. Human makapasahi sa iyang sista miawit dayon si Wilson.

Mutya ka sa tindahan/ning atong sityo ikaw ang himaya'ag katawa/sulondon ka kay matam-is nagpahiyom mo/mutya tugiti nga tugawon ka/niining awit nga alang kanimo/kay niining dughan ikaw ang mutya/ning atong sityo ikaw ang himaya'g katawa/sulundan ka.

Wala pa makatiwas sa iyang harana, migula si Lalaine nga grabing sukua. "Son, wa ka matagbaw sa imong pagbugalbugal nako. Hangtod karon imo gihapon kong bugalbugalan? Unsay mutya sa tindahan, mutya sa imong kasingkasing?" Sudya ni Lalaine kang Wilson.

"Wa ko magbugalbugal nimo Laine uy tinuod ning akong giharana nimo ikaw ang mutya sa akong kasingkasing". Pangatarungan ni Wilson.

"Bisan pag moluhod ka sa akong atubangan dili ko motuo nimo".

Dinhi naleksyon si Wilson nga dili gyud diay maayo nga magbugalbugal ilabi na gyud sa mga dalaga. Kay sa dagan sa panahon, basin ang atong gibugalbugalan mao ang babaye nga atong higugmaon.

Wala hinoon mulunga si Wilson. Kanunay niyang bisitahan si Lalaine sa iyang tindahan.

Ang kasuko ug kahiubos nahanaw. Ang kalooy ug kahinangop nagpatigbabaw. Nagkahigugmaay si Wilson ug ang mutya sa tindahan. (Katapusan)