Magsinabtanay sa Pasko

Taliabot na usab ang Pasko. Mora’g pipila lang kanato ang naghinamhinam sa pag-abot niini. Septiyembre pa lang gani magsugod na kita’g pangaykay sa tinaguan natong mga dekorasyon, ipangkutay dayon nato sama sa Christmas lights bisan asa na lang basta naay kabitayan anha sa kahoy, bintana, bongbong ug uba pa.

Unya didto sa dagkong mall gidayan-dayan usab og mga Christmas lights, mga parol aduna say rebulto ni Jesus, Maria, Jose, mga karnero ug ang tulo ka hari nga si Melchor, Gaspar ug Baltazar.

Usa ka adlaw niana gikaestorya ko ang akong amigo nga si Egen nga padung sa bulangan. “Bay, mora’g mingaw man rong umaabot nga Pasko duna unta tay bonus pero tua man padong sa atong giutangan nga tigpatanto?” ni JM nga gisagbat nila ni Egen ug Oplok. Apan wala kini magpasabot nga dili magmalipayon ang umaabot nga  Pasko. May pipila seguro kanato moingon nga magmasulob-on ang ilang Pasko tungod kay way ikapalit og pang-noche buena, o, wala sila’y madawat nga pinaskohan. “Pastilan, pagkamabaw niana nga panglantaw?” sagbat ni Inday ang tindera sa botika.

Ug kalit lang nahunong ang among gipang-estoryahanay kay may usa ka tiguwang nga gidakop sa pulis gumikan sa pagbasa-basa lang sa resulta’s jai-alai. “Abi ninyo ang kalipay wala manukad sa mga kalibotanong butang. Ang kalipay naggumikan sa kahiladman sa tawo. Ang kalipay naggumikan usab sa dakong paglaom nga bisan taliwala sa mga kasaypanan ug pag-antos nagminahalay ug nagkahiusa ang tagsatagsa ta ka pamilya,” ni Inday nga mabdos sa una nilang liwat sa iyang bana. “Kahibaw ba mong tulo, gugma lang ang gikinahanglan aron kita malipay, madato ka man o, kabus kung hikawan ka sa paghigugma, ang imong Pasko sama sa parol nga naponder?”  hirit ni Inday. Ug karong umaabot nga Pasko kitang tanan kinahanglan nga magsinabtanay labi na sa atong mga mahal sa kinabuhi ug atong ipaambit ang mga grasya nga gihatag nato sa labaw nga makagagahom busa karong magsinabtanay kita labi na sa mga politiko nga nagkasungi gumikan lang sa tagsa-tagsa nila ka garbo. (Katapusan)