Pasko sa payag

Disyembre 25, sayong nangmata ang managtiayong Judax ug Janice. Gikuha ni Judax ang iyang trisikad aron sa pagpamasahero.

Sayo silang nanihapon kagabii aron inig human mangatulog. Wala man sila maanad anang pabuto ug noche buena. Bisan gani ang bugtong nilang anak nga si Marian nagtungha lang sa publiko nga tunghaan, wa sad maanad anang regalo.

Sayo nimata si Marian naglingkod kini sa hagdan nga kawayan, nagtan-aw sa mga piso nga nanuktok sa pipila ka lugas nga mais ug giduol siya sa iyang tatay Judax.

Nitan-aw si Marian sa iyang tatay, dayon nibarog aron duolon si nanay niya nga nagtayhop sa tinughong. “Nay, Tay, way problema ang importante basko’g atong mga lawas?” ni Marian pa.

“Dili ko maibog anang mga duwaan Tay kay kahibalo man ko wa tay kwarta ug naa man gani koy kwarta ako na lang tigumon para palit og bugas,” ni Marian.

“Ang imo pag-eskwela maoy siguroa anak, para di ka mapariha namo ni tatay mo nga way grado,” sagbat ni Janice.

“O Nay, mao nay akong pinaskohan ninyo ni tatay kada tuig?” ni Marian nga nipahiyom.

“Salamat anak dili ka pareha sa mga kaklase mo nga way pamatasan ang uban sa ilang ginikanan,” ni Janice.

“Paningkamot gyud kay ikaw ray makahaw-as sa atong kalisod karon og matiguwang nami,” ni Judax.

“Alang sa mga datu tay, ang adlaw sa Pasko lahi gyud. Pero kitang mga kabus way kalainan sa tanang adlaw,” ni Marian nga mihapuhap sa agtang sa iyang tatay.

“Merry Christmas anak,” ni Judax nga nigakus og hugot.

“Kuhaa ning pandesal ug pansit pinalit ko ni sa gamay kung kinitaan sa paglabada,” ni Janice nga malipayon.

“Palihug ko’g kuha aring baso anak para ni tatay mo,” ni Janice nga nagkutaw og juice sa lamisa.

“Yes! Yes! Yes! Pasko na sa among payag may slice bread pa ug pansit. (Katapusan)