Gihimugso na ang bata

Sa edad nga 78, pangaliya ni Candedo, lugwayan pa ang iyang kinabuhi. Gusto niya nga sa dili pa ang pagsaulog sa Pasko, makalighot na siya sa hospital nga iyang nahimutangan human atakiha sa sakit sa kasing-kasing.    Kugihan nga  pagkatawo si Candedo, bisan ang iyang edad wala kini nakapugong kaniya sa pagbugwal sa duha ka ektaryang luna sa yuta nga nasunod niya sa iyang mga ginikanan. Bugtong anak si Candedo busa gibuhat niya ang tanan kay sayod siya wala siya’y kadangpan panahon sa kalisod.

Usa ka adlaw, sulod sa hospital nihangyo si Candedo nga mohanggap og lab-as nga hangin sa gawas. Human napahimutang sa lingkuranan, nananghid kaniya si Erning, iyang anak nga mobiya kadyot kay naay paliton. Unya samtang nag-inusara usa ka maanyag nga babaye ang niduol ni Candedo nagkugos kini og usa ka bata nga masuso nga bag-o lang gipakatawo.

“Kumosta, lolo Candedo,” sa babaye nga nitutok sa tigulang. “Ania, nag-antos sa akong sakit” tubag ni Candedo ngadto sa babaye. “Lolo, ayaw kalimot pagsampit kaniya”, sa babaye nga nitudlo ngadto sa langit.

Human mamulong gihagkan sa babaye si Candedo unya nigawas dayon kini sa tambalanan. Kalit nahinumdom si Candedo, sa gisulti sa iyang inahan ang pagsampit kanunay sa Labaw nga Makagagahum, nakapanghupaw siya ug nagbasol sa kaugalingon. Sa kinasing-kasing gipangayo niya sa Ginoo nga hupayon na ang iyang sakit. Nilabay ang mga gutlo natingala si Candedo kay inanay nga nigaan ang iyang lawas nawala usab ang pangapoy nga iyang gipamati, sa kahibulong sa iyang mga anak gitawag nila ang doktor.

“Congratulations, lolo, wala na ang imong sakit,” sa doktor nga nilamano sa tigulang. Human mabayri ang hospital nigawas dayon sila sa tambalanan. Samtang naglakaw nakita ni Candedo ang dakung belen nga gibutang daplin sa agianan. Nahasiga ang iyang mga mata. Maoy nasugat sa iyang  panan-aw ang babaye nga naghalok kaniya sulod sa hospital” siya diay si Mama Mary.

Nakita ni Candedo ang birhen diha sa sulod sa dakung belen, nagkugos kini og usa ka bata nga masuso, timaan nga natawo na ang batang balaan. (Katapusan)