Rosas gikan sa mangtas
May gikahibudngan si Rosalinda sa mga bulak nga rosas nga dad-on ni Adar matag gabii sa iyang pagpamisita sa dalaga. Ug alang kang Rosalinda si Adar ang lalaki nga gipitik sa iyang kasingkasing apan dunay problema kay ang iyang tatay ug nanay dakong supak niini.
Apan dili gyud mapugngan ang pinitik sa iyang kasingkasing ug iyang gidawat ang gugma ni Adar. Ug kining maong relasyon nila ni Adar iyang gililong sa iyang tatay ug nanay. Apan si Miguel nga anak ni Konsehal Tasyo nakaditik nga si Rosalinda ug Adar duna nay relasyon kay iya mang hiabtan nga naghagkanay ang duroha. Dinhi ingon sa misilaob ang kapungot nga dalang kasina ni Miguel nga mibusdak sa dala niyang mga tsokolate, mga prutas ug uban pang mga lamiang pagkaon.
“Yati ra hinuon ni, imo man lang kong gibinuangan, Ros, kay si Adar man ang imong gisugot, naghagkanay gud mong duha, grabe pud uy, alkanse ko ini!” Milanog ang tingog ni Miguel.
“Oo, uyab na ming Adar. Wa kay labot, uy, kay siya man ang akong gisugot ug dili ikaw. Wala man koy gugma nimo, si Adar ang akong gihigugma...” Mura’g nasuko si Rosalinda. Taudtaod miabot si Adar, may dala kining mga bulak nga rosas. Apan, wala lang damha mihagtik ang apapangig ni Adar sa kumo ni Miguel.
Ayyy! ni Adar pa nga nahagba sa salog. Misinggit si Rosalinda sa kasuko ug gipakanaog si Miguel sa silong. “Bastoss! Way batasannn!” ni Rosalinda pa. Igo lang mihapyodhapyod si Adar sa iyang apapangig nga maayo kaayong pagkaigo sa suntok ni Miguel.
Buntag sayo samtang naligo si Miguel sa tubod, kalit lang mitumaw si Adar. Mipahiyom kini kang Miguel.
“Guel, wala ko masuko nimo, apan nia ko aron paghatag nimo ining rosas,” ug giitsa ni Adar ang rosas ngadtong Miguel. Nasawo kini ni Miguel ug gisakitan si Miguel kay maoy iyang nakuptan ang tunok niini. Unya, hinayhinay nga nalup-og si Miguel. Pagka-ugma sa gabii si Adar ug Miguel nagkuyog na pagpangabat. Natakdan si Miguel ni Adar ug si Rosalinda nahimo pong mangtas nga ungo. (Kataposan)
- Latest
