Hagit sa kawad-on

Mikisdom ang panagway ni Mateo. Sakit sa iyang balatian ang mga pulong ni Adela. "Ikaw nahigugma nako. Panamin una, ug tan-awa ang imong dagway sa samin kun angayan ka bang mahigugma nako.

Kadaghan sa mga babaye dinhi sa campus, ako gyud imong tripingan? Naa si Ana, si Beatrez ug si Andrea parison kaayo mo ana nila."

"Adela, dili nato katudluan ang atong kasing-kasing ikaw ang gipitik niini". Mapaubsanong tug-an ni Mateo.

"Unya unsaon man wa man gyud ko nimo ka type. Sorry na lang".

Ingon sa nigara si Adela sa kasikat nga iyang naangkon. Matahom si Adela. Nahimo siyang Miss Campus Look sa ilang tunghaan. Daghan ang nangandoy sa iyang kasingkasing. Usa na niana si Mateo. Apan sa tanan kanila si Mateo ang lahi. Kasagaran lamang nga estudyante si Mateo walay ikapasingadto. Ang iyang mga uniporme ukay-ukay. Wala gani siya makatilaw og polo shirt. Ang iyang sapatos gision pa. Unsaon anak ra man siya og trisikad driver.

Human makagradwar sa high school, miadto si Mateo sa siyudad. Gipatungha sa iyang iyaan nga negosyante ug walay anak. Nagtarong siya pagtungha hangtod natapos niya ang iyang kurso.

Pipila ka tuig didto sa klinika. "Adela unsay akong ikaalagad nimo". Timbaya ni Mateo. "Dok, magpakunsulta unta ko sa akong anak grabi ang iyang  ubo." Ingon sa gibati og kaulaw si Adela.

"Adela kamusta ka. Unsa ang kurso nga imong nakuha?" Mapahiyumong nangutana ang doktor.

"Dok wa gyud intawon. Igo rang nakagradwar sa high school. Unsaon nabuntis man, nagminyo ku'g dali Dok, sorry kaayo ha, niadtong high school pa ta". Ingon sa nahilis si Adela.

"Aw, kadto hikalimti na kadto. Let bygone be bygone. Sa dili pa ko makalimot dapiton ka naku. Kasal nako karong sunod semana. Doktora ang akong pangasaw-onon. Tambong unya ha? Dad-a ang imong bana". Matinud-anong pagdapit ni Dr. Mateo. Human madawat ni Adela ang resita, milakaw siya padulong sa usa ka pharmacy. Diha sa iyang galamhan ang tumang pagbasol ug kaulaw sa iyang nabuhat ni Mateo, nga karon usa na ka Dr. Mateo Bonganciso. (Kataposan)