Ang kahumot sa agwa ni Insiang ungo

Dugay na nga gidungog sa sityo Bungol-Lubi nga dunay usa ka babaye nga ginganla’g Josefina nga gisunog kay mao kuno ang labing mangtas nga ungo sa maong dapit. Ug sukad niadto wala na gyoy gidungog nga dunay ungo sa sityo Bungol-Lubi. Malinawon na nga nanimuyo ang mga lumolupyo dinhi.

Apan kalit lang nga naukay, human sa 27 ka tuig ang milabay, kay duna kunoy gibalbal. Nahabwa ang tinai sa biktima ug ang biktima mao si Soling manikurista. Tungod niini, nanumpa ang igsuon niyang si Tasyo nga siya gyud mismo ang modakop sa mangtas. Kini samtang nag-inom sila sa iyang suod nga si Noel.

Unya, sa ilang panagsulti nahiagi si Insiang, ang biyuda nga guwapa ug seksi lang gihapon. Mialisbo ang kahumot sa agwa nga gigamit ni Insiang. Mipahiyom kini ni Tasyo. Mikuba ang dughan ni Tasyo kay hilom naibog siya kang Insiang. Miigham si Noel. Hasta pod siya dunay kaibog kang Insiang.

“Agi lang ko, ha, nag-inom diay mo dinhi, sayoha god,” ni Insiang nga mipahiyom.

Pagka sunod gabii, duna na say gibalbal, si Dionisio, ang sugarol og manok. Maayo kaayong pagka galhab sa tiyan ni Dionisio ug wala na ang iyang mga atay ug kasingkasing. Dinhi, nanumpa pod si Noel nga siyay moihaw sa mangtas, kay si Dionisio iyang ig-agaw.

Unya sa sunod adlaw nakahukom si Tasyo nga mamisita kang Insiang. Diha si Insiang sa balay niini. Taudtaod mitumaw si Noel ug tungod niini, midalidali og kaligo si Insiang kay sayod man siya nga siya ang tuyo ning duha ka barako dinhi sa ilang sityo. Huma’g kaligo, migawas si Insiang nga humot kaayo. Dugay ang ilang panag-istoryahay ug nagabhian ang mga namisita. Unya, kalit lang misulod si Insiang sa iyang kuwarto. Nagkidhatay sila si Noel ug Tasyo ug dali rang nagkasabot ang ilang tinan-awan. Ilang gisulod si Insiang sa kuwarto niini aron pahimuslan. Didto sa kuwarto  madungog ang singgit sa duha ka barako nga daw gisakitan. Pagka ugma, patay na ang duha ka barako kay gibalbal ni Insiang. (Katapusan)