Dili ka tourist spot

Ako si Jane. I met a young man sa usa ka dating site unya nag-meet mi atong June. Ganahan kaayo ko niya. Pila ka semana, naay nahitabo namo. Mas na attach gyud ko niya. Unya siya, nagsugod na'g ka way klaro. Busy daw siya kay klase. Hangtod niingon siya nga di na daw siya ganahan nako. Nihilak ko ug nihangyo pero di na gyud siya. Niingon ko's akong kaugalingon nga di na pud ko.

Pero paghuman sa pila ka semana, nibalik na pud siya og text nako ug niadto siya sa balay. Giingnan nako siya nga undangon na namo ni pero nihangyo siya nga dili lang daw kay okay ra man daw ming duha. Naluoy ko niya. Paghuman,naa na sad nahitabo namo. Makigkita ra siya kung ganahan siya. Mura nako og sugar mommy niya. Makahinumdum ra siya kun magbiga siya. Unya ako, di gyud makabalibad. Karon, two weeks na siya wa ni text nako. Mahadlok ko ug di pa nako madawat nga di na siya nako. Unsa akong buhaton? -- Jane

* * *

Hi Jane! Paghuman nako'g basa sa imong problema, nakaingon gyud ko nga love is blind. Di tungod kay bati'g nawong imong uyab, pero love is blind kay gapabutabuta ka tungod sa gugma. Kahibaw ko nga kahibaw na ka's tubag sa imong pangutana. Kuwang lang ka'g gamay nga dukol aron makamata ka's imong pagpakatanga. Sorry for the word. Sa imong giingon, nag-try ka'g move on. Kun nagpadayon ka, naka-move on na siguro ka karon. Ana gyud nang uban nga mga ex. Kung makita gani nila nga okay na ka, malipayon na ka nga wala sila, ug kaya na nimo nga ikaw ra usa, anha pud na sila mubalik. Mubalik, magparamdam ug magpa-sweet sweet. Kung magpailad ka, luoy ka. Hinumdumi, di tungod nga nibalik siya, mubalik pud ka niya. Buhaton nimo ang tanan para niya. Ang pangutana, mabuhat pud kaha na niya tanan para nimo? Jane, tawo ka. Ayaw og sugot nga GAMITON ra ka niya. Di ka tourist spot nga balik balikan ra ka niya. Balikan kung kanus-a siya ganahan.

Siguro, dili nimo siya mabuhian kay basin naghuna-huna ka nga wa nay laki nga muhigugma nimo nga pareha niya. Siguro pud, sakto ka. Pero, sigurado ko, naay lalaki nga muhigugma nimo'g tinud-anay ug labaw pa sa iyang gugma. Maong ayaw kahadlok buhian siya. Kaya gani niya kalimtan ra ka, kaya ra pud na nimo. Wa na siya naghuna-huna nimo. Ayaw na pud sige og huna-huna niya.

Usahay, kinahanglan nato buhian ang mga tawo nga importante sa atong kinabuhi, dili tungod kay wa na nato sila gihigugma, apan tungod kay mao gyu'y labing maayo nga buhaton para sa atong kaugalingon.

Madyo Maldito

* * *

Alang sa inyong problema nga buot ninyong patambagan kang Medyo Maldito, ipadala ka na sa: [email protected]