Birhen sa Regla nagmilagro

Nalipay si Nilda nga nahuman niya'g trapo ang rebulto sa mahal nga Birhen sa Regla. Apan wala damha niabot ang iyang bana nga si Pidot nga nibugalbugal sa maong imahe.

"Nilda, ilabay kanang rebulto sa Birhen sa Regla, kay dili kana molihok!" ni Pidot.

Pagkasunod adlaw may gipamati si Pidot, kay nagkaanam na'g kadako ang tiyan. Ug nasanglahon ang iyang panit. Unya niadto sila sa tambalanan.

Apan wala gyu'y kaayohan ang gihambin nga balatian ni Pidot. Nahibulong ang mga managtiayon diin gikan ang maong sakit. Nihilak si Pidot sa iyang gidangatan. Iyang gisampit si Nilda.

"Unsa man kining nahitabo nako, Nilda?" ni Pidot.

"Pidot, gaba na kana sa pagbugalbugal sa rebulto sa Birhen sa Regla!" ni Nilda. "Gipaamgo ka sa imong binuhatan."

Untop alas 9:00 sa buntag wala ang iyang asawa, kay namalit og mga pagkaon. Wala damha may nibutho nga usa ka babaye nga niduol ni Pidot.

"Pidot, pista na sa Opon ugma, adto didto aron sa pag-ampo!" matud sa babaye nga nilakaw dayong kahanaw.

Wala maglangay gituman niya ang gisulti sa babaye ug niadto sila sa simbahan sa Opon uban ni Nilda ug mga silingan nga sila si Narcita ug Margarita. Pag-abot nila sa simbahan daghang mga tawo ang nagdebuto sa Birhen sa Regla.

Ug may nabati si Pidot nga banda sa musekero. Iyang gitan-aw sa unahan nga ang nagsunod mao ang karusa nga gisakyan sa maong rebulto. Nagkaduol na ang karusa. Nahaigpot si Pidot, kay ang sakay mao man ang susama'g dagway sa babaye nga nakigsulti kaniya. Nahibulong ang iyang mga kauban nga puwerte nga nakatutok ni Pidot sa rebulto.

"Nganong gitutokan man nimo pag-ayo ang rebulto sa Birhen sa Regla, Pidot?" ni Nilda.

"Dili mahitabo nga masipyat ko! Kanang inyong nakita nga sakay sa karusa, mao kana ang nakita nako aron pasimbahon sa Opon!" ni Pidot.

Unya nag-ampo si Pidot sa Birhen sa Regla. Ug nagbasol sa iyang mga sala. Taudtaod naayo ang iyang mga sakit. Unya nitulo ang iyang mga luha sa kalipay nga naayo na ang iyang gihambin nga balatian. (Kataposan)