Daman Sa Udtong Tutok

Gula 40

Gusto kong itingob ang akong panahon sa akong anak, Jack." "Andam kong mopailob, Darlene," nagkanayon si Jack nga daw dako gayod ang tinguha pag-angkon sa akong gugma.

Usa ka gabii niana, namisita si Jack sa among balay. Nagdala siya'g lab-as nga mga flowers alang kanako ug ice cream alang sa akong anak.

"Dugay-dugay na kong nangulitawo nimo, Dar," matud ni Jack. "Hangtod karon wala pa ba gihapoy paglaom nga maangkon nako ang imong gugma?"

Wala ko motingog. Naglisod ko pagtubag sa pangutana ni Jack. Ang tinuod, inanay na akong mibati og paghigugma kaniya. Apan mahadlok kong makigrelasyon pag-usab sa usa ka lalaki. Basin og sama usab si Jack kang Rafael nga igo lang mopahimulos sa akong kahuyang. “Nagpaabot ko sa imong tubag, Dar," ni Jack pa.

"Hatagi una ko'g dugang panahon sa pagtimbangtimbang, Jack," matud ko. "Ikaw ang mag-igo, Dar," niya pa. "Ug panghinauton ko nga dili mo ako pagkyason. Hinaut pa unta." Ug wala madugay mipauli na si Jack.

Misulod na ako sa akong kuwarto. Akong natukmaan si Ava nga nahinanok na nga natulog. Gitutokan ko ang akong anak. Gihagkan nako ang aping sa akong anak nga nahinanok pag-ayo. Unya gibukotan ko siya sa habol.

Mihinay ako paghigda tupad sa akong anak nga si Ava. Mihayang ko ug ang akong mga mata nagpitawpitaw. Maoy unod sa akong hunahuna si Jack. Gipangutana ko ang akong kaugalingon kun dawaton ko ba ang gugma ni Jack o dili.

Dugay kaayo kong nakaumol og hukom. Kaadlawon na akong nakatulog. Nianang pagkasunod gabii, bisita na usab nako si Jack. Sa among panagsultihanay sa sopa sa sala, namatikdan ko ang talagsaong kaligdong sa iyang nawong. Mura ba'g nag-Biyernes Santo ang iyang panagway.

Apan dihang gisultihan ko siya nga may maayong balita ako alang kaniya, kalit lang misanag ang iyang panagway.

"U-unsa kana, Dar?" Sukna niya nga mahinamon.

"Gidawat ko na ang imong gugma, Jack," giingnan nako si Jack.

"T-tinuod ka, Dar?" ni Jack pa nga daw dili makatuo sa akong gisulti.

'Wa ko magtiaw, Jack," nako pa. "Ug hinaot nga imong ampingan ang atong gugma. Hinaot nga dili ko nimo pahilakon." "Makalaom ka, Dar," ni Jack pa. "Dili ko ikaw pasakitan." -- Sumpayan pa