Daman Sa Udtong Tutok
Gula 38
Nianang pagka gabii, misugyot na ang midwife nga dad-on ako sa sentro sa lungsod. Dili na kuno siya mopasalig sa pagpaanak kanako kay lisod na ang akong kahimtang.
Wala sila maglangan. Nagpakyaw sila’g kasakyan og gidala ako ngadto sa sentro sa lungsod. Didto gitabangan ako’g hiling sa tulo ka midwife ug usa ka doktor. Sila nagkauyon sa usa ka sugyot—dad-on ako sa Tagbilaran City aron adto ko manganak. Maglisod kuno sila sa pagpaanak kanako.
Naguol ko. Namatikdan ko nga nabalaka usab sila si tatay ug nanay. Bisan pa man, nadala gayod ako sa Tagbilaran City sa Gallares Memorial Hospital. Giatiman dayon ko sa mga doktor.
Usa sa mga doktor nga nag-atiman kanako mitawag kang nanay ug nagsultihanay sila sa gawas sa ward. Pagbalik ni nanay sa akong nahimutangan, nasihag ko ang kahingawa nga milabhag sa iyang nawong. Ako siyang gipangutana kun unsay gipakigsultihan sa doktor kaniya.
“Dako kuno kay sa kasarangan ang bata nga imong gisabak,” ni nanay pa. “Maglisod ka sa pagpahimugso niana. Posible kunong ma-caesarian ka.” “U-unsa?” nako pa nga nahikugang.
Nabalaka ako pag-ayo sa kasayuran nga gitaho nila ni tatay ug nanay kanako. Tiaw ba kun ma-caesarian ko?
“Giingnan ako sa doktor nga paandamon na og kuwarta,” ni tatay Barlo pa. “Posible gayod kuno nga disdisan ka kun dili mosugakod sa imong utong ang pagpahimugso sa bata,” dugang ni nanay Ludy.
“Ginoo ko,” nako pa nga gitay-og sa nagkadaiyang mga pagbati. “Mag-ampo kita sa Dios,” sugyot sa akong mga ginikanan nga nabalaka pag-ayo.
Hilom akong nag-ampo. Ang akong mga ginikanan naglingkod habig sa may tiilan sa gihigdaan nakong hospital bed nahilom usab. Mikibot ang ilang mga ngabil samtang gipiyong ang mga mata.
Taudtaod, misakit ang akong tiyan. Nagtawag dayon si tatay og doktor ug midwife. Ilang gisusi ang akong kahimtang. “Sulayi kunog utong,” sa doktor pa. “Basin og masugakod nimo ug dili na kinahanglang i-ceasarian ka pa.”
“Utong gyud kutob sa imong mahimo, Day,” giingnan ko sa midwife. “Ayaw kahadlok. Moalalay lagi mi nimo.” – Sumpayan pa
- Latest
