Daman Sa Udtong Tutok

Gula 33

Unya wala ako makatutol dihang gihushos ni Rafael ang kataposang salimbong sa akong pagkababaye.

May nahitabo gayud namo ni Rafael niadtong higayona. Apan sa dako ko nga katingala, wala siya mangusisa kun ngano nga dili na ako birhen nga pagka babaye.

Nasayod ko nga nadiskubrehan niya nga dili na ako putli. Apan wala siya mangutikuti kanako mahitungod niini. Unsa man kahay hinungdan?

Naluoy kaha siya kanako? Dili kaha siya buot nga masakitan ako mao nga wala na lang siya mangutana kun unsay nahitabo sa akong pagkababaye?

Kining maong mga pangutana maoy mituhil-tuhil sa akong hunahuna.

“Karon nga may nahitabo na kanato,” akoy mihagad sa pagtuki bahin sa kamatuoran nga akong gililong kaniya. “Nasayod ka na tingali nga dili na ako ulay nga pagka babaye.”

Wala siya motingog. “Dili ka ba lang mangutana kun kinsay nakauna nako?” ako siya nga gisukna.

“Kinahanglan pa ba nga masayod ako niana?” matud ni Rafael.

Ako na usab ang wala makatingog. (Sumpayan)