Diin man kining salapi

Puno sa kabalaka ang gibati karon ni Liza tungod sa hitabo sa iyang anak. Nagbuntag kining wala’y kinatulgan tungod sa ubo.  Tres anyos pa lang ang iyang anak mao nga bisan kun unsaon og amping di kalikayan nga ubhon gayud kini.

Maayo niadtong unang tuig nga giubo kini kay diha man siya tinigom niadto. Apan karon wala gayud.

Gidala ni Liza ang iyang anak sa klinika sa lungsod. Didto nasayran ni Liza nga bronchitis ang sakit sa iyang anak. Nakadawat siya og mga resita sa doktor. Apan wala siya’y salapi nga ikapalit. Midangop siya sa iyang mga silingan apan pulos balibad ang iyang naangkon. Bisan kadtong mga tawong iyang gituohan nga adunay mga kwarta mibalibad lang gihapon. “Wala mi’y kwarta Liz, tinuod naa mi sakyanan ug gwapo ang among balay apan inutang intawon ni. Daghan pud mi og problema.” Balibad sa asawa sa usa ka seaman.

Niadto siya sa pharmacy gitahan ang resibo sa iyang TV apan gibalibaran gihapon siya. “Dili mi makapasalig nimo maam kay tindera ra mi wala diri ang among amo.” Huyhoy ang abaga ni Liza nga nipauli sa ilang balay. Maoy iyang nakita ang mabalak-on niyang bana. “Liz, atong dad-on si Inday sa ospital grabing hilanat sa bata nagkumbulsyon siya.”

Gidala nila sa ospital ang bata apan ingon sa wala gihapo’y kapuslanan. Wala sila’y kuwarta nga ikapalit og tambal. Namatay ang bata. Grabi ang kaguol ang gibati ni Liza tungod sa kamatayon sa pinangga niyang anak. Kun may kwarta pa lang sila, o di ba may nagpahulam pa lang unta niya dili gyud unta mahitabo nga mamatay ang iyang pinalanggang anak.

Sa haya sa iyang anak sa balay nangabot ang iyang mga silingan nga nagdala sa ilang hinabang. Ang uban nihatag og usa ka gatos, dosentos aduna pa gani kinintos. Ang kapitan nipakita pa gani sa iyang simpatiya. “Liz pahasubo sa namatay nimong anak. Dawata kining usa kalibo.”

Nakahilak si Liza. Nakaingon siya sa iyang kaugalingon. “Diin man kining salapi sa dihang gikinahanglan pa naku kini. Karon na hinuon nga wala na naku kini kinahanglana?” Misamot pagbakho si Liza. (Kataposan)