Demalas
Dear Tita Salie,
Tawga lang ko og Madam. Gusto lang ko makahibalo kun naa ba g’yuy tawo nga demalason. Nakabantay man gud ko, dili lang kay kausa nahitabo sa akong kinabuhi nga kun nalipay man gani ko, mas grabe g’yud ang malas nga akong naangkon. Motuo ka ba og demalason? Pasabta ko.
* * *
Dear Madam,
Ang pagtuo sa uban nga kining demalas maoy gimbut-an na sa Dios apan dili kana maoy pagtulon-an sa Bibliya. Kun tinuod pa nga gimbut-an kana sa Dios ang atong kapalaran, dili na unta kinahanglan nga molikay pa kita sa mga peligroso nga kahimtang ug dili na kinahanglang atimanon pa ang atong panglawas sa usag-usa. Nganong moadto pa man kita sa doctor aron magpatambal?
Madam, ang kasulatan (Job 34:10) nagaingon: “Busa, kamo nga may kasingkasing nga makasabot, pamati kanako. Halayo ra sa matuod nga ang Dios maoy nagbuhat sa pagkadaotan.
Nagpasabot kini nga kadtong nangabiktima, dili kadto gimbut-an sa Dios o demalas. Sila maoy biktima ug ang nagmugna mao ang yawa. Mao kini ang paphaon unya sa Dios sa gitakda nga panahon. – Tita Salie
- Latest
