Daman Sa Udtong Tutok

Gula 26

Nakighigala kanako ang drayber sa akong mga agawon. “Friends na ta ha,” matud ni Rafael. “Sure,” matud ko.

Mao kadto ang sinugdanan sa panagsuod namo ni Rafael. Bisan kun maguwang siya nako’g upat ka tuig apan ingon sa katalirongan ko lang siya. Nagkasinabtanay gayud kami sa daghang mga butang.

Buotan si Rafael. Responsable siya nga pagkatawo. Gani, diha nga gisuweldohan na kami sa among agawon, nagpadala gayud siya’g kuwarta ngadto sa Negros.

Alang kuno ang maong kuwarta sa iyang mga ginikanan ug igsuon.

Usa ka adlaw’ng Domingo niana, gidapit ko ni Rafael sa pagpanuroy. Sanglit day-off ko man usab kadto, misanong ako sa iyang pagdapit.

Nangaon kami sa usa ka fastfood restaurant sa downtown. Unya nanuroy kami sa Plaza Independencia. Daghang mga tawo niadtong tungora sa plaza.

Diha nga gikapoy na kami sa pagpanuroy, nanglingkod kami sa lingkoranan nga semento nga nahimutang sa ilawom sa landong sa kahoy. Nakugang ko diha nga kalit lang gigunitan ni Rafael ang tuo nako nga kamot.

“I love you, Darlene,” niya pa. Nakalitan ako pag-ayo sa pagpadayag ni Rafael nga nahigugma siya kanako. (Sumpayan)