Night market

Gula 18

Wala kapugngi ni Alma ang kalipay nga si Cesar diay maoy nakaluwas sa iyang amahan diha nga gitulis kini sa duha ka tulisan samtang gikan nga mikobra og kuwarta sa bangko.

Gigakos ni Alma ang iyang hinigugma. Wala masayod si Cesar sa tukma niya nga pagabuhaton kay maoy misantop sa iyang kaisipan nga sigurado gayud nga masuko kaniya ang amahan sa dalaga.

Human nga nagakos ni Alma si Cesar, ang iya na usab nga amahan maoy iyang gigakos. Naghilak si Alma nga miumod sa iyang nawong ngadto sa dughan sa amahan niya nga Muslim.

“Diin ka man natulog gabii. Wala ka man mipauli sa balay?” pangutana sa amahan ni Alma. Wala dayon motubag ang dalaga. Ingon sa nagpundo pa kini og kaisog sa iyang kaugalingon.

“Pasayloa kami si Cesar, Pa. Si Cesar mao ang giingon ko kaninyo nga akong boyfriend,” matud ni Alma dungan sa paggakos usab sa hawak sa ulitawo samtang padayong naghilak.

“Unsa?” bugtong pulong nga nalitok sa amahan ni Alma nga mitutok pag-ayo kang Cesar. “Pasayloa ko sir, apan dili binuang ang akong paghigugma kang Alma, nagkaminahalay kaming duha,” matud ni Cesar.

Mura’g mikisdom ang panagway sa amahan ni Alma. Lawom kaayo ang gihuna-huna. Unya, gibuhian niini ang usa ka halawom nga pagpanghupaw.

“Buyno, bisan og supak sa atong tradisyon nga maminyo ka sa dili nato kadugo, apan kay nakita nako ang kabuotan niining lalakiha, hatagan ko kamo sa bendisyon,” matud sa amahan sa dalaga. (Taposon ugma)