Night market

Gidala sa police station si Cesar ingon man ang guwardiya sa bangko nga nagbantay sa pultahan. Gisukit-sukit sila sa mga polis kabahin sa hitabo nga pagtulis sa tawo nga bag-o pa nga mikobra og kuwarta.

Human sila makahatag og pamahayag sa kapolisan, nagkuyog sila si Cesar ug ang guwardiya sa bangko pagpanggawas. Gipakuyog na lang sa guwardiya si Cesar pagkasayod nga magkobra siya’g kuwarta sa bangko.

Taud-taud, mitingog ang call alert sa cellphone ni Cesar. Si Alma ang nanawag kaniya. “Sar, moadto ko sa CCMC kay gidala kuno sa opital si Papa kay emergency,” matud ni Alma nga mura’g nagdali ug wala mahimutang.

Gikulbaan si Cesar. Dali ra siya nga nakakobra og kuwarta sa bangko ug midali pagsakay’g taxi si Cesar aron apason si Alma sa CCMC. Samtang nagdagan ang taxi nga gisakyan ni Cesar, nakadawat na usab siya og text message gikan ni Alma.

Nagpahibalo kini kang Cesar nga anaa siya sa emergency room. Pagkanaog ni Cesar sa taxi, diha pa siya nahinumdom nga dili diay siya angay nga magpakita sa mga ginikanan ni Alma.

Nabalaka siya sa iyang kahimtang. Sigurado gayud nga dagmalan siya sa mga kadugo ni Alma nga mga Muslim kun masayod sila nga siya ang Kristiyanos nga gikarelasyon sa dalaga.

Apan nagpakaisog si Cesar. Misulod siya sa emergency room. Mitutok kaniya si Alma samtang diha sa tupad sa iyang amahan. “Oh, maayo kay mianhi, salamat kaayo,” matud sa amahan ni Alma.

Nahibulong si Alma. “Siya ang mitabang kanako. Nakita nako nga iyang gibunalan ang mga tulisan human ako nila pusila sa abaga,” matud sa amahan ni Alma. (Sumpayan)