Ang tulo ka lungon

Bisan gabii na kaayo, apan nagpadayon gihapon si Fausto sa pagpamasahero sa kaugalingon niyang taxi. May nasiplatan siya nga usa ka hamtong babaye nga nagbarog atbang sa Plaza Independencia.

Gikamay si Fausto ug pagsakay niini, nagpahatod kini sa sam-ang. Nagkatapad gyud sila sa pagsakay sa taxi. Unya may nabantayan siya nga ang babaye may gapas na ang dunggan, ilong ug baba.

Nanlimbawot ang iyang balahibo. Sa tanto niyang pagmaneho, kalit lang nga adunay nibabag sa agianan ni Fausto ug nagguroy og taas nga kadena. Gipahunong usa ni Fausto ang taxi.

“G-gwapa ug gwapo, paagia ko ninyo!” ni Fausto. Tuod nagpadaplin lang sab dayon ang duha. Mipadayon si Fausto sa pagmaneho sa taxi ug diha nga duol na siya sa sam-ang giuyog ang iyang sakyanan.

Taudtaod may kasikas siyang nabati sa iyang luyo. Nahaigking pag-ayo si Fausto, kay ang mga bag-ong sakay mao na man ang duha nga nagguroy og taas nga kadena.

Nisamot ang iyang kahadlok. Diha nga niabot na sila sa atubangan sa pultahan sa sam-ang gipahunong siya sa tulo ka sakay sa taxi. Gitutokan siya pag-ayo sa nilawom nga mga mata sa tisay ug tisoy, hasta sab sa hamtong babaye.

Apan sa kalit lang nahipugwat pag-ayo si Fausto kay ang tulo nagkadungan sa pag-usab sa bayhon hangtod nga nahimong mga santilmo ug nideretso kini padulong sa tulo ka nitso. Mipasirit sa taxi si Fausto.

Untop alas 2:00 sa hapon niadto si Fausto sa sam-ang uban sa iyang mga ambongang higala nga sila si Gilbert ug Fredmon. Unya namalit sila’g mga kandila ug buwak diha atubangan sa sam-ang.

Wala palandonga, may nakita sila sa unahan nga daghang mga tawo nga nanagpayong ug ang uban nanaghilak. May gisunod sila nga tulo ka porlon. Nagkaanam na’g kaduol sa ilang nahimutangan. Diha nga giplastar na ang mga lungon, gitan-aw ni Fausto ang sulod sa tulo ka lungon ug nahaigpot siya sa iyang nakita.

“Nganong misiga man ang imong mga mata, Fausto?” ni Gilbert.

“G-Gilbert ug Fredmon, kanang tulo nga inyong nakita nga sulod sa lungon, mao kana ang nagkadungan nga nahimong santilmo nga nagpadulong sa tulo sab ka nitso!” ni Fausto.

“Kinsa’y magdahom nga ang tulo ka tawo nga misakay sa akong taxi gabii, mao diay kining ania sa tulo ka lungon. (Kataposan)