Kalag nga ni flying kiss

Biyahero si Romeo sa kaugalingon niya nga pambot. Magbiyahean siya matag buntag ngadto sa hapon. Kining iyang pambot inilisan kini’g mga manok igtatari.

Ang higala ni Romeo naibog kaayo sa iyang mga manok igtatari mao nga gihagad siya nga ilisan kini og pambot. Mga magtutudlo ang sagad pasahero ni Romeo gikan sa isla paingon sa lungsod.

“Romeo, pasakya ko,” hangyo ni Fatima, nga taga isla. Apan wa g’yud niya pasakya. “Gabii na man gud ron, mahadlok ko mosakay og lain?” ni Fatima pa.

“Gikasubo nako Fat, husto na ang akong mga pasahero. Suki ko kini sila si Bethy, Haide, ug Sharie Mae nga taga Cordova, balibad ni Romeo.

Sayo sa buntag giandam ni Romeo ang iyang pambot aron pagkuha sa mga suki niya nga mga maestra nga nagtudlo sa ilang isla. Natingala si Romeo nga daghang tawo sa pantalan sa iyang pagdunggo. Maoy nisugat sa mga mata niya nga nagbuy-od ang patay’ng lawas ni Fatima.

Nanglabay ang katuigan, nangapo na si Romeo apan di g’yud niya malaksi sa iyang panumduman ang maong panghitabo. Hangtud karon mao gihapon ang trabaho ni Romeo, kuha ug hatud sa mga maestra.

“Gaw Romeo, ngano man nang pambot mo nga wala man moandar, gabii na,” ni Erwin nga iyang agaw nga nagpuyo sa Cordova. Sa niandar na ang pambot nisakay dayon si Romeo.

“Arang-arang hayag ang buwan ug maklaro nako ang tibuok kadagatan!” ni Romeo nga nidagkot sa iyang sigarilyo.

Apan kalit lang nitabon ang panganod sa buwan ug nag-anam-anam pagkisdom ang kalangitan. Uban sa paghaguros nga hangin, kalit napawong ang makina sa pambot ug may bugnawong tingog nga iyang nadungog.

“Romeo...Romeo...! Kumusta ka!” sa tingog nga bugnaw. “K-kinsa ka! Kun tawo ka pakita, kun dautan ka pahawa?” ni Romeo nga naghilak tungod sa kalisang.

Unya may bayhon sa babaye nga puti ang senina nga diha sa dagat ug nag-atubang kaniya nga naghilak.

“Imo pa lang unta ko nga gipasakay, buhi pa unta ko karon Romeo? Wala unta ko malugos?” ni Fatima.

“F-Fatima! Ikaw ba kana?” ni Romeo.

“Fatima pasayloa ko, pasayloa intawon ko?”

Kalit lang nahanaw si Fatima. Niandar na ang makina sa pambot ni Romeo. Nahinumdom si Romeo nga adlaw na man diay sa mga minatay ugma.

Iyang giduaw ang lubong ni Fatima ug gipahinungdan og mga pag-ampo. Nasiplatan ni Romeo si Fatima nga naglingkod sa nitso nga nagpahiyom, dayon mi-flying kiss. (Kataposan)