Mga kalabera

Usa ka gabii niana, namasahero si Alphe sa iyang inabangan nga multicab. Unya may nakita siya nga guwapa’ng babaye nga nagsul-ob og lubos puti. Nisakay kini ug nagpahatod sa menteryo.

Nakamatikod si Alphe nga ang iyang pasahero bugnaw ang tingog. Nanlimbawot ang iyang mga balahibo, labi na nga nitapad kini kaniya sa pagsakay.

Sa tanto nga pagpadagan ni Alphe sa multicab, kalit lang may nilagubo sa iyang luyo. Abtik kaayo nga nakalingi si Alphe ug napugwat siya kay may lain na man nga nagsakay, usa ka lalaki.

Nahibulong kaayo si Alphe kun diin gikan ang tisoy nga lalaki nga unta ang babaye ra man nga nagsul-ob og puti ang iyang pasahero kaganina.

Pag-abot nila sa menteryo, mingaw kaayo ang palibot. Mitunol og plete ang duha ka pasahero ni Alphe. Human gayud sa paghatag sa kuwarta, napasiga ang mga mata ni Alphe kay nagkaanam og kausab ang bayhon niini ug nahimong kalabera.

Pagkaugma, untop alas 4:00 sa hapon niadto si Alphe sa menteryo uban sa iyang mga barkada nga sila si Rael ug Felix. Didto sa menteryo, nanagkot ang mga managhigala sa dako’ng krus pahinungod sa ilang kaliwat nga nitaliwan na sa laing kalibutan.

Unya may duha ka dako’ng alibangbang itom nga naglupadlupad nga nisakdap ni Alphe. Nakalitan ang iyang mga higala.

“Nganong nisakdap man nimo ang duha ka alibangbang itom, Alphe?” ni Rael.” Tingale mahal na nimo sa kinabuhi nga nitaliwan sa laing kalibutan.”

“Basin kaliwat na namo nga nitaliwan, Rael,” ni Alphe pa.

“Magpadagkot siguro sila nimo’g kandila, Aphe!” sagbat ni Felix.

Unya sa tanto nilang tan-aw sa duha ka alibangbang itom didto kini paingon sa duha ka nitso nga duol sa ilang gibarugan.

Apan sa kalit lang, nanglurat ang mga mata ni Alphe kay nakita niya ang duha ka hulagway nga susama’g hitsura sa nisakay sa iyang multicab kagabii.

Nahibulong si Rael ug Felix nga puwerte’ng nakatutok sa ilang higala nga si Alphe sa duha ka hulagway.

“Dili mahitabo nga masipyat ko, sila ang nisakay sa akong inabangan nga multicab kagabii!” ni Alphe.

“Kanang inyong nakita nga duha ka hulagway nga gitugdonan sa duha ‘sab ka alibangbang itom, mao kana ang duha ka kalabera nga akong gibiyaan!” (Katapusan)