Daman sa udtong tutok

Gihinayon gayud nako ang pagpasaka og kaso batok ni kuya Cain tungod sa iyang paglugos kanako.

Ang barangay kapitan maoy mihangyo ni Coco nga motestigo batok sa akong maguwang. Sa sinugdan, nagdumili si Coco apan nakumbinser ra siya ni Kapitan Nolie.

Samtang nagpaabot sa pagbista sa kaso, si kuya Cain nga nagtingkagol na sa bilanggoan nagsige’g tugon ni bisan kinsa nga kaila nga paduawon sila si tatay Barlo ug nanay Ludy kaniya.

Sa sinugdan, wala sila mosanong si tatay ug nanay apan sa kadugayan nakahukom sila nga duawon ang akong igsuon sa bilanggoan.

“Mokuyog ka?” matud ni Nanay.

“Di ko, nay. Kamo na lang si tatay. Nahibawo na kamo kun ngano,” matud ko. “Nakasabot mi nimo, Darlene. Sagdi lang, nakahukom kami nga duawon siya tungod kay mahinungdanon man kuno siya nga pakigsultihan kanamo. Maayong masayran nato kun unsa kini,” matud ni tatay. Nahitutok ako kang tatay Barlo. “Ikaw ang mag-igo, Tay. Basta kay ako, kasilag ang gibati ko ngadto kaniya karon,” giingnan ko ang akong amahan.

Tuod, miduaw gayud sila si tatay Barlo ug nanay Ludy sa nabilanggo ko nga maguwang. (Sumpayan)