Naglabay ra’g kuwarta

Tiyo Norvic, nganong dili man g’yud ka maminaw og tambag sa imong mga igsuon? Naluoy sila nimo, ilabi na sa imong mga anak nga mga dalaga na sila’s Gemma, Patty ug Sonia,” matud ni Leo ngadto sa igsuong lalaki sa iyang inahan.

May gusto nga mamisita sa mga ig-agaw ni Leo apan dili sila makadawat og bisita kay dunot kaayo ang ilang balay nga wala gipaayo sa ilang amahan kay ang kuwarta niini gigamit sa negosyo nga sige lang og kabangkarota.

Gipahimudsan ni Leo ang higayon nga sila ra ang  nahibilin nga nagmata ning lawom nga gabii. Nagbilar sila sa haya ni Lola Ciriaca, inahan ni Norvic, nga namatay sa edad nga 94.

Si Norvic, usa ka biyudo nga seaman. Kada bakasyon niya human sa biyahe, makatigum si Norvic og subra usa ka milyon ka pesos. Kaduha na nagpundar og negosyo nga hardware sa ilang lungsod apan wa’ abti og tuig, nabangkarota kay dili g’yud kamao modala og negosyo.

Ang iyang balay nga nadunot tungod sa anay, wa’ g’yud ma-repair. Maulaw modawat og bisita ang iyang mga anak. Delikado’g magtagbo-tagbo na lang kini ug sa ilang mga boyfriend sa bisan asa nga lugar.

Si Leo usa ka arketekto. Nakaasawa siya og interior designer. Wa’ pa sila’y anak ug maayo sila moamping sa ilang kuwarta. Dili basta-basta mobuhi og kuwarta kun wa’y klaro ang negosyo.

“Ubos man gud ang tan-aw sa mga tawo nato kun wa ta’y kuwarta,”     ni Norvic. Nanglugod sa mata kay nagduka na.

“Sa ato pa, kun ikaw ang pagbut-on, mas maayo nga maglabay og kuwarta aron masayran sa mga tawo nga may kuwarta ka,” ni Leo.

“Wa lay suwerte ang akong negosyo,” ni Norvic. “Dili na sa suwerte tiyo. Moapil gani ka’g negosyo, kinahanglan nga kamao ka anang negosyoha. Dili nimo ipiyal sa tawo nga wa’y kaluoy nimo,” matud ni Leo.

“Unsa man diay gusto nimo nga akong buhaton?”

“Sa sunod nimong bakasyon tiyo, unaha og gasto ang pagpa-repair sa imong balay. Unya kun may sobra, palit og yuta nga katamnan og hardwood,” ni Leo.

“Kadugay natong makakuwarta ana,” matud ni Norvic. “Unsa may imong dalian? Kanang imong kahoyan mapahimudsan na nimo inig’ retire nimo sa trabaho,” dason ni Leo.

Naghinuktok si Norvic sa gitambag kaniya sa iyang pag-umangkon. (Kataposan)