Night market

Gula  7

Nakahinuktok si Cesar samtang naghunahuna sa gisulti kaniya ni Alma nga usa diay ka Muslim ang dalaga.

Nahanduraw niya ang kaagi sa iyang higala nga si Bebot nga nakarelasyon usab og Muslim nga dinhi sa Sugbo magtungha nga narisgo ang kinabuhi diha nga napamabdosan niya ang iyang girlfriend.

Sulod sa pipila ka tuig, ang higala ni Cesar wala na magpakita dinhi sa Sugbo kay gidumtan ug gibaharan nga panimaslan sa mga Muslim nga paryente sa iyang girlfriend nga napamabdosan.

“Uy, naghinuktok ka man gud,” matud ni Alma nga mihikap sa nawong ni Cesar. Diha pa nga si Cesar mura’g nahigmata gikan sa usa ka halawom nga paghanduraw.

Wala dayon motubag si Cesar kang Alma ug hinuon, iyang gibuhian ang usa ka lawom kaayo nga pagpanghupaw. “Unsa may akong buhaton Alma?” gisukna ni Cesar ang dalaga.

Mura siya og kalit lang naluya. Miandar pag-ayo ang iyang utok ug ingon sa mipaspas ang pagpitik ang iyang kasing-kasing. Gipiyong ni Cesar ang iyang mga mata, dayon gibuka kini ug gilantaw sa unahan.

“Andam ko nga magsakripisyo tungod ug alang sa akong matuod nga gugma kanimo Alma. Ikaw, andam ka ba nga magsakripisyo tungod ug alang kanako?” gisukna ni Cesar ang dalaga.

Wala motubag si Alma apan niining tungora, gisandig niya ang iyang ulo ngadto sa dughan sa ulitawo. Bisan og wala pa mosugot si Alma kang Cesar, apan sa iyang linihokan klaro na nga gisugot niya si Cesar.

Gihagkan ni Cesar ang aping sa dalaga. (Sumpayan)