Dako’ng kahon

Pito kami ka managsuon. Ako ang ikaduha ug si mano Ruben ang kamagulangan. Panagat lang ang pangita ni tatay Victor ug si nanay Epen, sa balay lang nag-atiman sa akong mga manghod.

Usa ka adlaw niana, adunay negosyante nga Insik nga napadpad sa among dapit nga usa ka isla sakop sa Bohol. Sa akong nasayran, ang Insik nangita og mga tawo para sa Palawan.

Panagat ang trabaho. Tungod sa kalisod niaplay mi ni mano Ruben isip usa ka bosero. Lima kami nga taga isla, ang uban taga pikas nga isla. Nananghid mi ni tatay ug nanay.

“Kun mao kana mga anak mosugot kami ni tatay mo pero pag-amping baya mo didto kay dili tiaw ang lawod sa Palawan, daghan og iho?” matud ni nanay.

Unom ka bulan ang kontrata ni Ruben ug Jorge. Gibinlan og P20 mil ang among pamilya sa isla. Nahinumdom kami ni mano Ruben sa among kalisod.

Usa lang ka kumkom nga bugas ang lugawon ni nanay ug tabangan namong pito ka managsuon. Usahay gani, init tubig lang ang among higupon para lang mainitan ang nagkutoy namo nga tiyan.

“Bay Ruben, kalawom ba nimo’g gihuna-huna. Wala pa gani ta nakasugod?” ni Berting nga among silingan.

“Ha-haa...?” ni Ruben nga nakalitan.

“Kamo Luben, Belting ug Jorge, kamo salom dagat ugma ha!” matud sa Insik. Pagka ugma nisalom si Ruben, Berting ug Jorge, gamit ang compressor.

Sa didto na sila sa ilawom sa dagat, gisulod nila ang dagko’ng lungag. Daghan sila’g kuha sama sa tipay nga may perlas ug nagkadaiyang mga kinhason. Puwerte’ng lipaya sa Insik. Usa ka adlaw, gihilantan si Ruben. Bisan siya og gihilantan, gipasalom gihapon siya sa Insik.

“Sir, mahimo ba nga atong papahulayon si Ruben kay grabe na ang iyang hilanat?” ni Berting pa.

Nilabay ang tulo ka bulan, namatay gayud si Ruben ug kay dili man makadunggo ang fishing boat gitawag sa Insik si Jorge.

“Jorge, kuha ka dako kahon, butangi daghang ice, isulod Luben para di baho?”

Pag-abot na sa unom ka bulan, niuli na kami uban sa dako’ng kahon nga gisakay sa lansa.

“Dong, Jorge, hain si Ruben,” pangutana nila ni tatay ug nanay. Gitudlo ni Jorge, pinaagi sa iyang simod ang kahon.

Sa pag-abli nila sa kahon, nakita nila ang lawas ni Ruben nga nagluko intawon. Nagsubo ang tibuok isla. (Katapusan)