Night market - Gula 2
Ingon sa nasubo si Cesar pagkasayod nga kutob na lang niadtong adlawa ang night market sa Colon kay nagpasabot kini nga dili na sila magkita si Alma, ang tindera sa suki niya nga kan-anan.
“Kun mao kana Al, dili na diay kita magkita. Mingawon na unya ko nimo,” mura’g may kasubo ang tingog ni Cesar nga mitutok kang Alma. “Hatagan lang tika sa akong contact numbers aron makontak ko nimo,” matud ni Alma.
Tuod, abtik kaayo nga gikuha ni Cesar ang iyang selpon gikan sa iyang bulsa ug gitunol kini kang Alma. “Ipalihug ko’g encode sa imong contact numbers,” giingnan ni Cesar ang maanyag nga tindera.
Wala na kaayo masagmuyo si Cesar bisan og moundang na ang night market tungod kay magkakontakay man gihapon sila si Alma. Gibalik pagtunol ni Alma ngadto kang Cesar ang selpon sa ulitawo.
Gikontak ni Cesar ang numero ni Alma. Mitingog sa bulsa sa karsones-maong ni Alma ang iyang selpon. Gi-phone book usab ni Alma ang contact numbers ni Cesar. “Usahay ra ba mahutdan ko’g load, basin mahibulong ka nga dili ko makatubag,” matud ni Alma.
Pagka ugma sa gabii, haw-ang kaayo ang gibati ni Cesar tungod kay samtang miadto siya sa dalan Colon aron mukaon, mingaw na kay wala na may night market. Sulod sa usa ka fast food restaurant, giteksan ni Cesar si Alma samtang nagpaabot siya sa iyang giorder nga pagkaon.
Wala tuod madugay, mi-reply si Alma. Gidaygan dayon niya ang maanyag nga dalaga sa iyang gibati. “mizz u, Alma.” (Sumpayan)
- Latest
