Titanic

Ang iyang mahimo karon mao na lang ang paghandom sa kagahapon kay ang iyang gugma sama sa nahiuban pagkalunod sa barkong Titanic.

Gani sa higayon nga makabati siya sa awit nga My Love Will Go On, mahinumdom dayon siya kang Ana, ang babaye nga nahitipik sa iyang kasingkasing sa hamubo lang nga panahon.

Nagkaila sila si Ana dihang nahiagi siya sa balay nga giabangan niini. Nanglaba niadto si Ana ug nagdaylang ang iyang puti nga paa samtang naglingkod nga nanglaba.

Nadapit ang panan-aw ni Peter ug nahunong siya sa paglakaw. Diha pa makabantay ang babaye nga may tawo diay nga nagtan-aw ug gidali pagkipot ang duha niya ka paa.

“Kamo diay ang bag-ong nag-abang dinhi?” gipahimuslan ni Peter ang pagpakigsulti sa babaye. Igo lang miyango ang maanyag nga babaye.

“Kinsa man ang imong kauban?” dugang pakisayod ni Peter.

“Akong mama ug akong anak.” Ingon sa dili makatuo si Peter. “Ha? Minyo na diay ka?” Milingo-lingo si Ana ug nakasabot dayon si Peter.

Sukad niadto, matag agi ni Peter sa ila ni Ana, mag-estoryahay una sila kadali. Si Ana nagtrabaho isip tindera sa canteen sa tunghaan ug gabii na nga mouli. Nasayran ni Peter nga ang amahan sa anak ni Ana anaa sa siyudad sa Sugbo apan wa na gayud mopakita mao nga giisip na gayud ni Ana nga libre na siya kay wa’ man pud sila makasal.

Nagkarelasyon sila si Peter. Tinuod gayud ang paghigugma ni Peter kang Ana ug nakahukom na siya nga iya kining pakaslan.

Kausa nagkuyog sila dinhi sa siyudad sa Sugbo ug didto sa usa ka hotel gidimdim nila ang kalipay. Didto nasayran ni Peter ang kamaayo moduwa ni Ana sa kama.

Ang mao nilang kalipay nasundan pa og lain apan didto na sila sa pension house sa silingang lungsod magtagay sa kalipay. Nakabantay si Peter kang Ana nga sa matag higayon nga anaa sila sa sekreto’ng lawak. “Ayaw g’yud usa ko’g pabuntisa, ha?”

“Apan ngano man? Pakaslan bitaw tika.” “Basta, ayaw lang g’yud. Asa ra bitaw na!”

Usa ka buntag nahibulong si Peter nga sirado ang tibuok balay nilang Ana. Nasayran ni Peter nga may lalaki nga miabot mga tungang gabii na.

Pagka kaadlawon, nakamata ang mga silingan tungod sa mga kasikas sa balay nilang Ana. Nakita nila nga nagkuyog sila si Ana ug ang lalaki nga mikugos sa bata ug nagsunod ang mama ni Ana nga may dalang dako’ng bag. (Kataposan)