Daman sa udtong tutok

Gula 3

Dinhi natibuok na gayud ang akong pagduda nga daotan ang buot pagabuhaton ni kuya Cain kanako.

Nasudlan og demonyo ang iyang utok!

Layo sa kabalayan ang among umahan. Hilit ang maong dapit. Bisan pa’g mosinggit ko, naseguro ko nga wala’y makadungog kanako.

Gawas pa, ingon sa dili na usab ako makasinggit kay daw gikutasan ako sa kalisang. Mikurog ko sa kahadlok.

Diha nga nakahigayon, gipahit nako ang ngabil ni kuya Cain sa diha’ng gihagkan na usab niya ang akong ngabil.

Nahasinggit siya sa kasakit. Iya ko nga nabuhian. Dihadiha mikaratil ako pagdagan.

Apan abtik si kuya Cain nga migukod kanako. Iya ko nga naapsan ug gigakos. Gumikan sa akong paglugnot-lugnot, nangatumba kaming duha.

Nagpadayon si kuya Cain sa iyang gibuhat. Mipatong siya kanako ug gihagkan ang akong ngabil, liog ug dughan.

Kasukaon ko kay gibati nako ang kaluod sa ginhawaan sa gihimo sa akong maguwang. Nagpadayon ko sa pagkisikisi. Ako siya’ng gitukmod.

Hangtud nga naputong na tingali si kuya Cain sa akong pagpanglugnot, gidaitlan niya sa tumoy sa sundang ang akong liog. Mikurog ko sa kahadlok ug wala na ko molihok pa. (Sumpayan)