Ambisyosa

Gula 13

Mihari ang kamingaw tali kanila ni Lito ug Marit. Mura’g naghuwat ang usa’g-usa kanila kun kinsa ang mouna sa pagsulti. Gihuna-huna pag-ayo ni Lito ang gisulti sa amahan ni Marit nga ang dalaga tinagalan na ang iyang kinabuhi.

Ingon sa dili makatuo si Lito nga gitagalan na ang kinabuhi ni Marit, apan dili usab siya motuo nga nagbinuang lang ang iyang amahan. “Kumusta diay ang imong lovelife Lit? Dili ba abughoan ang imong girlfriend?” si Marit maoy mibuak sa kahilom tali kanila.

Mitutok si Lito ngadto sa dalaga dungan sa pagpahiyom. “Wala na ako’y girlfriend karon Marit. Gipulihan ko niya og laing lalaki nga kuwartahan ug makahatag sa iyang kapritso… sa iyang panginahanglan,” matud ni Lito.

Mura’g gibati’g kalooy si Marit kang Lito. “Kun may ikatabang pa lang ko nimo, akong buhaton aron lang magkauli kamong duha,” ni Marit pa nga ingon sa tinuoray’ng nalooy sa kahimtang ni Lito.

“No, dili na usab ako makig-uli pa sa kanhi ko nga girlfriend. Dili sama kaniya ang angay ko nga panggaon hangtud sa hangtud,” giingnan ni Lito si Marit. Mibathay ang pahiyom sa panagway ni Marit.

“Aw, ikaw Marit, ngano nga wala man moanhi karon ang imong boyfriend?” gisukna ni Lito ang dalaga. “Wala ko’y boyfriend Lit…daghang nanguyab nako apan mga anak og adunahan nga pulos hilig kaayo’g tsiks. Gusto ko unta ang lalaki nga sama kanimo og batasan,” matud ni Marit.

Nahatutok si Lito sa dalaga nga salabtonon kaayo ang tinan-awan. (Sumpayan)