Panangko

Ning hapona, gipaulahi ni Estoy sa pagpangabis ang nag-inusara ug nalahi niya nga punoan sa sanggotan, ang lubi nga dahili nga hilabihan ‘sab ka hinuba.

Sa 20 niya ka punoang sanggotan diin makakuha siya og tag napulo ka galon nga tuba, ang 19 niya ka sanggotan pulos mga lubi nga limbaon nga tag-as ang mga punoan.

Nagkinahanglan gayud kini og kinatkatay sa mga hakhak paingon sa itaas, dala ang mga himan niya sa pananggot, sa matag pangabis inigkahapon.

Apan lahi ang bugtong punoan sa dahili nga sanggotan. Mubo kini nga pagkalubi ug dili na mistil pa nga mokatkat sa punoan. Kab-uton ug magtindog lang si Estoy sa iyang pagpangabis.

Sayon ra usab niya nga limpyohan ang sanggab nga sugong pinaagi sa pagwalwag sa iyang pitlagong. Mao bitaw nga tungod kay mubo ra ang punoan sa lubi nga dahili, inig tangko ni Estoy matag buntag niini, usahay wala na’y tuba ang sugong.

Aduna’y motangko sa tuba sa sanggotang dahili ni Estoy matag kaadlawon. Kay ang lubing dahili hilabihan man ka hinuba, ang tunga sa sugong nga tuba sa sanggab niini, kanunay’ng gikwitis sa mananangko matag kaadlawon.

Hilom nga naglagot si Estoy sa mananangko sa iyang sanggotan matag kadlawon. May gikatahapan siya!

Mao nga niining hapona, gituyo nga gipaulahi ni Estoy sa pagpangabis ang lubi nga dahili nga iyang gisanggotan.

Uban sa tungog nga iyang gitempla, gisagolan niya og usa ka sawpan nga dinukdok sa sili’ng kulikot. Ang mapangahasong mananangko segurado g’yud nga mag-udhak sa tumang kahalang inig-inom sa tuba, inigka-kadlawon.

Sayo nga nanawat si Estoy sa iyang mga sanggotan sa pagkabuntag. Gitigom niya ang nadawat niyang mga tuba sa baro nga sudlanan.

Sama sa naandan, wala na sa’y sulod nga tuba ang sanggab nga sugong sa lubi nga dahili nga sanggotan.

Mipauli si Estoy sa ilang balay aron magkuha og mga galon nga balhinan niya sa tuba nga gisulod sa balde. Gisugat siya og balita sa iyang asawang si Eyay.

“Toy, nagkagubot man ang atong silingan! Nag-udhak si Galy, nagdigwa nga naglaway ang baba, mora’g giatake ug hilabihan sa kapula ang nawong nga mura’g nalutong pasayan!

Gitabang si Galy! Tua gidala sa ospital...!” Hilom nga nahimuot si Estoy sa gibalita kaniya ni Eyay! Husto gayud ang iyang katahap nga si Galy mao gayud ang tigtangko sa tuba sa lubing dahili niya nga sanggotan matag kaadlawon. (Kataposan)