Maniniyot

Sukad pa sa ulitawo ug hangtod nga naminyo na lang si Perto, ang iyang panginabuhi mao ang pagka maniniyot kon kodaker. Mahiligon kaayo si Perto sa camera mao nga nabansay siya pagka maniniyot ug maoy iyang panginabuhian aron mabuhi ang asawa nga si Hilda ug tulo ka anak.

Wala’y bisyo si Perto, dili motabako ug labi pa nga dili moinom og ilimnong makabubog, dili ‘sab sugarol. Ang iyang panahon gigugol ra sa iyang trabaho ug sa iyang pamilya.

Ang income ni Perto sa iyang pagka maniniyot dili g’yud daku apan igo ra g’yud makabuhi og usa ka pamilya ug makapaedukar sa mga anak.

Sa iyang pagkamaniniyot ni Perto, starring siya kanunay kay anaa man siya sa tunga magpasopaso, ilabi na’g pista ug adunay rayna nga koronahan.

Magsambilay si Perto sa iyang camera ug kadali ra nga mohagtik ang iyang camera sa bisan unsa nga anggulo. Kusog pa gud sa kilat kun mokidlap na ang flash bulb sa iyang camera.

Pinaagi sa iyang pagka “kodaker” naninguha si Perto nga mahatagan og maayong ugma ang iyang mga anak. Milampos g’yud tuod ang iyang mga anak ug nakaangkon og mga kurso.

Si Brian nakatapos og Computer Science, si Ruby usa ka magtutudlo samtang si Mennie nakahuman sa iyang office administration.

Luyo sa kalamposan sa iyang mga anak, padayon gihapon si Perto sa naandan niya nga trabaho. Wala’y pagkutat ang bul-og sa iyang paninguha ug paningkamot nga nahisama kini sa tubig nga nakahunat na pagbul-og sa mahabog nga bungtod.

Kay alang kang Perto, ang iyang gugma pagka photographer usa kini ka arte. Dili mahimo nga iyang talikdan ug labi pa nga dili malaksi sa iyang balatian ang iyang pagka maniniyot kay nahimo na kini nga tipik sa iyang kinabuhi ug sa iyang pagpakabuhi.

Usa ka adlaw’ng Domingo, samtang nagkapundok sila sa ilang balay, gipakigsultihan ni Perto ang iyang asawa ug mga anak bahin sa iyang plano. “Unsa man kanang imong plano, Tay, isulti?” hapit magdungan ang tulo ka managsuon sa pagpangutana.

“Karon nga nakalampos na kamo ug may mga trabaho na, buot ko nga magpatukod og usa ka estudyo, aron anhi na lang ako magdebelop,” matud ni Perto.

“Aw wala’y problema Tay, approve,” matud sa mga anak ug nanghugyaw sila og pagpangatawa. Sangko sa langit ang kalipay ni Perto. Iyang nganlan og “Perto’ Studio.” (Katapusan)