May mutya ang tarima

Congrats attorney, mao kana ang kanunay mabati ni Atty. Diego Monteverde gikan sa iyang mga kabanay ug mga higala. Nakalampus siya sa labing lisod nga pasulit sa atong nasud nga mao ang abogasiya.

Kini nakahatag kaniya’g kalipay ug sa tibuok niya nga banay.

Ilang gisaulog ang iyang kalampusan. Gidapit nila ang ilang mga kabanay ug mga higala, apil na niini si Conchita, ang hinigugma ni Diego sukad pa niadtong high school pa sila. Tungod sa kakulian, wala makapadayon si Conchita sa pagtungha sa kolehiyo. Ang iyang panahon iyang gigahin sa pag-abag sa iyang pamilya pinaagi sa pagka tindera og isda sa merkado.

Wala kini makababag sa ilang pagminahalay. Hinuon kini nagdasig ni Diego nga magmalampuson aron mahaw-as sa kalisod ang ila unya nga pagpuyo.

Ang selebrasyon nagsugod na. Human sa makabuhong nga salu-salo, ang programa gisunod dayon.

Human sa makapakitbi sa atay nga pakigpulong sa mga ginikanan, mga igsuon ug mga higala, gipaila dayon sa tigpaila si Atty. Monteverde nga mohatag og pakigpulong.

Human makapangayo og katahuran sa tanang nanambong, gisugdan dayon ni Atty. Monteverde ang iyang pakigpulong.

“Una sa tanan, akong gipasalamatan ang atong Labaw’ng Makagagahom nga maoy tuburan sa atong kaalam, ingon man usab ang akong mga ginikanan nga nagsakripisyo alang kanako aron ako magmalampuson. Ako usab nga pasalamatan ang tag-iya sa akong kasingkasing, ang mutya sa tarima sa merkado -- si Miss Conchita Mondragon! Siya kanunay’ng nagpaluyo kanako aron ako molampos. Panahon nga kulang ang akong budget siya andam og tagana...”

Human sa makapadasig nga pakigpulong ni Atty. Monteverde, gisundan dayon kini og pasundayag sama sa kinaraan nga sayaw. Wala magpaperi si Atty. Monteverde ug si Conchita. Samtang sila nagsayaw, gihunghongan dayon ni Atty. Monteverde si Conchita.

“Conchita, karon nga hingpit na ako nga abogado, hingpiton usab nato ang atong plano nga magpakasal, ug human sa atong kasal gusto nako nga hukason na nimo ang imong korona isip mutya sa tarima sa merkado ug dayon imong isul-ob ang korona isip mutya sa atong panimalay.”

Mipahiyom si Conchita. Paglabay sa mga adlaw, gikasal si Atty. Monteverde ngadto sa mutya sa tarima sa merkado nga si Conchita. (Kataposan)