May gitago ang kangitngit

Gula 88

Nakapanglingo-lingo si SPO1 Nicko Bernal sa nahitabo sa iyang asawa ug anak nga gidagit na sa mga sakop sa Bangkulisan.

“Mitawag na ako sa kuwerpo ug nagpaingon na dinhi ang atong mga kauban. Sila na ang mohipos sa patay’ng lawas sa upat ka polis nga napatay sa mga Bangkulisan. Kinahanglang mamalik na kita karon dayon sa Tinago,” matud sa hepe.

“Husto ka, Sir. Nagtuo ko nga atua dad-a sa Tinago ang akong asawa ug anak sa mga sakop sa kulto,” matud ni Nicko nga ingon sa nagpangagot ang ngipon sa kalagot.

“Kalma lang, Nicko. Tingalig dili ka na hinuon makahunahuna sa angay mo nga buhaton. Gikinahanglan niining higayona ang imong kalig-on,” matud sa hepe.

Namiya dayon sila sa rest house sa hepe ug mibiyahe balik ngadto sa Tinago.

Gikasugat nila ang gisakyan sa mga kauban nila nga polis nga maoy mougkat sa patay’ng lawas sa upat ka polis nga napatay sa mga Bangkulisan. Gikab-ot gilayon sa hepe ang hand held radio ug nakigsulti sa nangulo sa mga polis nga ilang gikasugat.

“Kamo na ang maantigo nga mohipos sa patay’ng lawas sa upat nato ka kauban,” nagkanayon si Chief Inspector Dindo Raval. (Sumpayan)