Naamiga sa FB

Gula 8

Pinaagi sa tindera, nasayran ni Ramon nga kinaham kaayo ni Kenn ang chocolate ice cream cup kay walay sipyat nga mopalit gayud kini kada gabii sa dayon niining katulog.

Nakahuna-huna si Ramon nga iyang palitan og ice cream si Kenn. Gikan sa tindahan, mitabok si Ramon sa atbang ug nanuktok sa pultahan. Taud-taod nga nanuktok si Ramon nga walay miabli sa pultahan.

Padayon nga nanuktok si Ramon. Taud-taod, miabli ang pultahan. “Uy, ikaw man diay ang nanuktok Mon. Ngano nga mianhi ka man?” matud ni Kenn nga klaro kaayo nga luya ang pamati sa lawas.

“Nahingawa ko nga wala ka na mo-post sa Facebook ug dili ‘sab makontak sa imong cellphone,” matud ni Ramon nga mitutok pag-ayo sa dalaga nga luya kaayo ang panagway.

“Dali, sulod usa Mon,” ni Kenn. Gitunol ni Ramon ngadto sa dalaga ang gipalit niya nga chocolate ice cream gikan sa tindahan.

“Hala, gidad-an ko nimo’g ice cream, ang ako pa g’yud nga kinaham,” mibathay ang pahiyom sa iyang panagway.

Gikaon g’yud dayon ni Kenn ang gidala nga ice cream ni Ramon. “Luoy nimo uy, maayo unta nga masahean ka aron molagsik ang imong lawas kay makasirkular man ang imong dugo sa lawas,” matud ni Ramon.

“Unta lagi, pero wala ko’y kaila nga masahesta,” dali nga tubag ni Kenn. Nakahuna-huna si Ramon nga tanyagan ang dalaga nga siya na lang ang momasahe niini.

“Kun dili nimo hatagan og dautang kahulogan, ako na lang ang momasahe nimo Kenn,” ni Ramon. (Sumpayan)