May gitago ang kangitngit
Gula 85
Diha nga napahimutang na ang tanan ug nahatagan na sa hepe og pahimangno ang mga polis nga mobantay nila ni Gelli ug Barbie, nananghid na si Chief Inspector Dindo Raval kang Nicko nga mobalik na siya sa lungsod sa Tinago.
“Kun gusto ka nga magpabilin dinhi, anaa ra kanimo. Mas maayo hinuon aron makatabang ka sa pagbantay sa bata,” matud sa hepe.
Nakahukom si Nicko nga mokuyog na sa Tinago kay nagtuo siya nga luwas na ang iyang anak. “Kinahanglang makabalik ako sa Tinago aron ipadayon namo ang pagpangita sa mga sakop sa kulto,” ni Nicko.
“Ikaw ang mag-igo, Nicko,” sa hepe. Tuod, mibalik dayon sila si Chief Inspector Raval ug Nicko sa lungsod sa Tinago.
Pagkagabii, nagpatrolya sila si Nicko. Kauban niya sila si PO3 Roy Canares, PO1 Rudy Alarcon ug PO1 Reuben Lebra. Namasin sila nga ilang ikahibalag ang mga sakop sa kulto sa ilang pagsum-ok sa lainlaing kabarangayan sa lungsod.
Apan wala sila’y naani sa ilang lakaw kay wala may timailhan nga magpakita kanila ang mga sakop sa kulto. Namalik na lang sila sa kuwerpo.
Si Nicko wala mopauli sa ilang balay. Didto na siya natulog sa kuwerpo sa kapolisan. (Sumpayan)
- Latest
