Ethical issue

Kining tawo nga himabaye o palikero, kadaghanan wa’y dugokan ug baruganan. Palingpaling. Sa makauna la’g galgal!” tuaw ni Atty. Abner  Bigal.

Naproblema siya nga nagsud-ong sa Judicial Affidavit ibabaw sa iyang lamesa nga papirmahan niya. Hinimo ni sa abogado sa mga anak sa kinaslan.

Nagkaburoka ang pamilya ni Inting mahitungod sa kabtangan. Negosyante ug adunay daghang yuta, commercial complex ug mga apartment si Inting.

Biyudo na si Inting ug may pito ka anak sa iyang asawa. May napulo usab siya ka anak sa iyang kabit nga si Vina. Si Inting gikiha sa iyang mga anak bahin sa binahinay sa kabtangan.

Pagkamatay sa abogado ni Inting nga rekomendado ni Vina, gikuha ni Vina si Abner nga mopuli. Usa ka hapon, bisita ni Abner sa iyang bupete si Inting ug iyang mga anak sa kinaslan.

Niuli si Inting sa ila tungod sa death anniversary sa iyang asawa. Duna na sila’y Compromise Agreement nga preparado sa abogado sa mga anak. Ang pirma na lang ni Inting ug Abner ang kulang.

Giayo ni Abner og sukitsukit si Inting kun hugot na ba g’yud ang iyang hukom nga makig-areglo sa mga anak. Nitando sa makadaghan ang tiguwang. Namirma sila.

Paghibalik ni Inting ngadto sa iyang kabit, nausab ang iyang hunahuna. Ipanulo niya ang Compromise Agreement. Gipapirma ni Vina si Abner og pagluwat isip abogado sa tiguwang.     

Apan gusto ‘sab sa mga anak ni Inting sa kinaslan nga dili g’yud manulo ang Compromise Agreement. Patestigoson nila si Abner mahitungod sa pagtando sa makadaghan sa ilang amahan.

Wa pa gani nakahuman og basa si Abner sa Judicial Affidavit, nibagting ang telepono sa iyang lamesa. “Hello” ni Abner pagpunit sa telepono.

“Maayong hapon panyero,” tingog ni Atty. Hector, ang abogado sa mga anak sa kinaslan ni Inting. “Nipirma ka na?”

“Sorry, panyero. Karon lang ko kaamgo nga dili diay ko angay motestigos batok sa akong former client. Maigo ko sa unethical conduct ug gross ignorance of the law. Ang fact inyong ipa-establish puwede ra man isaysay sa usa sa mga anak ni Inting,” ni Abner.

Gipaningot si Abner ug nikuot og panyo. Namahid sa agtang ug nawong. “Ok ra panyero. Duda bitaw ko nga mobalibad ka tungod sa ethical issue,” ni Atty. Hector.

Nakabuhi og lawom nga panghupaw si Abner. Hapit siya masugamak. Nisaad man gud og dako nga fee ang usa sa anak ni Inting. (Kataposan)