May gitago ang kangitngit

Gula 84

Gipasabot ni SPO1 Nicko Bernal ang iyang anak nga mamalhin sila pagpuyo kay nameligro ang kinabuhi niini tungod kay may mga tawo nga buot mopatay kaniya.

Human makapanghipos, misakay dayon sila sa sakyanan nga gipangunayan sa pagmaneho ni Chief Inspector Dindo Raval. Nagsunod kanila ang sakyanan nga giluwanan sa upat ka polis nga maoy ilang back-up.

Nagpaingon na sila sa lungsod sa Naatang diin mahimutang ang rest house sa hepe. May gilay-on kini nga 50 kilometros gikan sa Tinago.

Human sa kapin oras nga pagbiyahe, miabot na sila sa rest house nga nahimutang sa usa ka hilit nga dapit sa lungsod. Mingaw ug layo sa highway.

Wala’y magtuo nga may matahom diay nga rest house nga nahimutang sa maong dapit kay sekreto kaayo ang maong lugar ug nagtuo si Nicko nga dinhi luwas sa peligro ang iyang anak.

Dili mosugot si Gelli nga mahimulag siya sa bata. Nakasabot ‘sab si Nicko sa gibati sa inahan.

Mimando si Chief Inspector Raval nga ang upat ka polis nga ilang kuyog maoy magbantay sa bata.

“Maneguro lang kita, Nicko,” sa hepe pa.

“Ikaw ang mag-igo, Sir,” ni Nicko. (Sumpayan)