Naamiga sa FB

Gula 5

Una nga milusad sa tubig si Kenn ug nagsunod kaniya si Ramon. Apan kalit lang nga ingon sa natakilpo si Kenn diha nga nakatamak og hait nga bato. Abtik kaayo si Ramon nga nakasagakay sa dalaga. Wala tuyoa nga nahikapan ni Ramon ang nag-ugdo nga bahin sa dughan sa dalaga. “Sori kaayo Kenn, wala nako tuyoa,” matud ni Ramon. Abi niya og masuko si Kenn sa iyang nahimo.

“No problem Mon, para hikap?” matud ni Kenn nga nagpahiyom kang Ramon. Miapil na lang ‘sab si Ramon sa pagpahiyom apan mura’g dala ang kauwaw. Misamot ang gibati nga kainit sa lawas ni Ramon nga naghuna-huna nga nakahikap siya sa dughan ni Kenn.

Miipon sila si Ramon ug Kenn sa grupo sa pagpangaligo. Nakahukom ang magbarkada nga magduwa sila og dakup-dakop. “Hala, dili ra ba ko maayo mosawom, madakpan g’yud ko pirme,” giingnan ni Kenn si Ramon.

Wala gayud mobuwag si Kenn kang Ramon. Usahay motago si Kenn pinaagi sa pagpahipi kang Ramon aron dili siya makit-an. Sa hilom giganahan si Ramon sa mao nga sitwasyon kay kanunay nga mogunit kaniya ang dalaga.

Si Kenn maoy kanunay nga madakpan apan abtik usab kaayo ang dalaga nga modakop kang Ramon nga anaa ra sa iyang tupad. Si Ramon na ang maninguha nga makadakop og lain nila nga kauban.

Human nga makadakop na si Ramon og ilang kauban, mobalik siya sa nahimutangan ni Kenn. Sadya kaayo ang ilang pagpangaligo. Dali ra kaayo nga nagkasuod sila si Kenn ug Ramon. (Sumpayan)