May gitago ang kangitngit

Gula 82

Gitug-anan ni SPO1 Nicko Bernal ang ilang hepe nga ang iyang anak nga si Barbie maoy sunod nga target sa mga sakop sa kulto.

“U-unsa? Pero, giunsa man nila pagkasayod nga natawo sa Septiyembre 8 ang imong anak?” mura’g nakugang si Chief Inspector Dindo Raval.

“Mao kana ang akong nalibgan pag-ayo, Sir. Nagtuo ko nga husto ka gayud sa imong pangagpas nga lawom kaayo’g intelligence network ang maong kulto,” mubo nga tubag ni Nicko.

“Nan, unya, unsa may giplano mo karon alang sa imong anak?” sa hepe. “Nakahuna-huna ko nga tagoan si Barbie, Sir, apan wala ko masayod kun asa ko siya tagoi nga dili siya matultolan sa mga sakop sa kulto,” matud ni Nicko.

“May nahunahunaan ko’ng dapit, Nicko,” matud sa hepe.

“Asa man, Sir?” ni Nicko.

“Sa akong rest house nga tua sa lungsod sa Naatang. Layo ug sekreto ang maong lugar. Nagtuo ko nga safe didto ang imong anak. Kun gusto ka, adto nato siya tagoi didto,” sugyot sa hepe.

Ug niana dayong adlawa, milihok dayon sila si Nicko ug ang iyang hepe. Miadto sila sa balay ni Nicko aron kini tagoan adto sa rest house ni Chief Inspector Raval. (Sumpayan)