Naamiga sa FB

Gula 1

Nadani g’yud si Ramon sa pagpalit og touch screen nga cellphone diha nga misuroy siya sa higante’ng mall sa SM. Ang iya gud nga mga barkada pulos na moderno ang cellphone.

Matag karon ug unya, takulahaw lang kini nga mag-selfie ug i-post dayon sa Facebook, unya dayon og pangatawa. I-like dayon kini sa iyang mga amigo ug amiga.

Nagpatudlo dayon si Ramon sa iyang amigo nga si Felipe kun unsaon paggamit ang iyang cellphone ug nga kanang maka-Facebook sab siya. Tuod, dali ra nga nakakat-on si Ramon.

Sa tanto niya nga ukay-ukay sa iyang cellphone, nadani ang iyang pagtagad sa usa ka hulagway sa babaye. Maanyag ang mao nga babaye. Gipadak-an ni Ramon ang hulagway sa babaye ug wala’y pupamilok nga gisud-ong.

Wala gayud mosipyat si Ramon, guwapa gayud ang babaye. Gipakita dayon kini niya sa higala nga si Felipe. “Guwapa bitaw. I-invite aron friends mo,” giingnan ni Felipe si Ramon.

Tuod, wala madugay, gi-accept sa babaye ang invitation for friendship ni Ramon. Gi-scan dayon nila ang hulagway sa mao nga babaye ug nasuta nila nga bisan asa nga angles, guwapa g’yud.Gisugdan ni Ramon ang pakigsuod sa babaye pinaagi sa paghimo og mga comments sa iyang mga posts. Dayon, mohimo siya og mga likes sa posts sa iyang bag-ong friend.

Hangtud nga iya nga gipadad-an og personal message ang babaye. Gipangutana sa tinuod niini nga ngalan. (Sumpayan)