Ang bulinaw nahimong mamsa

Si Mrs. Rivera usa ka magtutudlo sa ikatulong ang-ang sa elementarya sa Barangay Candobo nga grabe ka estrikta.

Basta estudyante ka niya sigurado nga makutaw ang imong utok. Daghang estudyante ang naglikay nga siya maoy ilang mahimong magtutudlo.

Sa unang adlaw nga nagtudlo si Mrs. Rivera gipabarug niya og dugay ang usa ka estudyante kay wala makatubag sa iyang pangutana.  “Dili ko ganahan og estudyante nga dili maminaw!, kasabot? Ikaw Cleopatra magpabilin ka sa atubangan nga magbarug hangtud dili ka makatubag sa akong pangutana,” mitaas ang iyang kilay nga nanighawak.

Ang ubang estudyante gikulbaan basin sila na ‘sab ang pangutan-on. Mahuwasan ra sila kun mahuman ang klase. Usa ka higayon nabantayan si Bartolome nga wala maminaw. “Bartolome! Pila ka side ang circle?” “Duha ma’m, inside ug outside” tubag niya nga nangalot sa ulo.

“Mao nay resulta sa dili maminaw. Aduna diay side ang circle nga wala man?” matud sa maestra nga naglagot.

“Utok nimo bulinaw, pataka lang og tubag!, maayo pa’ng mopauli ka ug mamingwit og bulinaw!” matud sa maestra. Paglabay sa mga adlaw, ang magtutudlo nahibulong ngano nga wala motungha si Bartolome. Basin nahiubos sa iyang gipamulong.

Iyang nahibaw-an nga mipauli na diay si Bartolome sa ila sa Bantayan kuyog ang iyang ginikanan. Milabay ang daghang katuigan. Tulo ka bulan na lang sa dili pa moretiro si Mrs. Rivera, usa ka kotse ang mihunong atubangan sa eskuylahan.

Nanaog ang usa ka hamtong lalaki nga may gidala nga karton. Nangita ni Mrs. Rivera. Nahibulong ang maestra ug nangutana nganong gipangita siya?

“Nakalimot ka na nako ma’m?,” ako si Bartolome, ang imong estudyante kaniadto nga imong gisultian nga maayo pa mamingwit og bulinaw,” pahinumdom niya sa kanhi magtutudlo.

“Mibalik ko dinhi aron magpasalamat. Supplier ko karon og bulad bulinaw sa tibuok Visayas. Kay naminaw man ko sa imong gipanulti… matubag na nako ang mga kinahanglanon sa akong kinabuhi,” dayong hatag niya sa karton sa iyang kanhi magtutudlo. “Ma’am dawata ang akong regalo nimo, usa kini ka computer set. Tungod kanimo miasenso ang akong kinabuhi,” dayong lamano ug pananghid.

Milakaw si Bartolome nga nagtan-aw sa karaang eskuylahan, milingi siya kadiyot unya mipahiyom sa kanhi magtutudlo una misakay sa kotse.

Mitulo ang luha ni Mrs. Rivera kay sukad siya nahimong magtutudlo karon lang siya nakasinati nga adunay estudyante nga nakahinumdom ug nagpasalamat kaniya.

Nakasulti siya sa hilom nga ang iyang gitawag og bulinaw kaniadto, karon usa na ka mamsa. (Kataposan)