May gitago ang kangitngit
Naghinuktok si SPO1 Nicko Bernal sa katahap ni PO3 Roy Canares nga ang maestra nga si Mrs. Tommi mao ang lider sa kulto. Nahiunlod si Nicko sa halawom nga pagpamalandong.
“May posibilidad tuod kanang imong pagduda, Roy. Apan unsaon man nato kana pagpruyba?” matud ni Nicko.
“Sayon ra, atong panid-an si Mrs. Tommi aron masuta nato kun siya pa ang lider sa Bangkulis Black Brotherhood. Dili gayud siya motug-an bisan giunsa pa nato’g bitikbitik. Busa mas maayo pa nga atong panid-an ang iyang kalihokan,” ni PO3 Cañares.
Nakombinser si Nicko sa ideya. Tuod, niana nga pagkagabii, gipanid-an nila si Mrs. Tommi aron pagsuta sa pagduda ni Roy nga ang maong magtutudlo mao ang pangulo sa kulto.
Apan wala sila’y naani sa gihimo nila nga pagpaniid. Wala nila makita nga milakaw si Mrs. Tommi niana nga gabhiona.
Pagkasunod gabii, gipanid-an gihapon nila si Mrs. Tommi. Ngitngit ug mingaw kaayo ang kagabhion. Didto sila si Nicko ug mga kauban nagpahipi sa luyo nga bahin sa balay sa magtutudlo.
Hapit na ang alas dose sa tungang gabii dihang misiga ang mga suga sa sulod sa balay ni Mrs. Tommi. Nagbantay og maayo sila si Nicko. (Sumpayan)
- Latest
