Tilaw sa katam-is - Gula 15

Naghilak si Shane nga miumod sa iyang nawong ngadto sa dughan ni Arthur. Nagbakho pag-ayo si Shane ug gihapuhap ni Arthur ang iyang buko-buko aron sa pagpanaya-naya sa gibati’ng kaguol sa dalaga.

Nakasabot na si Art nga ang pagkanta diay ni Shane og Sayang nga popularized ni Claire dela Fuente dihang nag-videoke sila nagumikan diay sa pagtuo sa dalaga nga dili na siya angay pa nga higugmaon tungod kay natugyan na niya ang iyang pagka babaye sa kanhi niya boyfriend.

Gamit ang iyang palad, gipahiran ni Art ang mga luha ni Shane nga nanaligdig sa aping sa dalaga. “Ayaw na paghilak Shane. Ingon niana gayud ang kinabuhi, adunay kapakyasan apan kun molurang na ang unos sa kapalaran, anaa usab ang kalampusan,” ni Arthur.

Anam-anam nga milurang ang pagbakho sa dalaga. “I love you,” matud ni Art dungan sa pagpatik og hawok kang Shane. “Love you too, Art. Unta, dili na ako makasinati pa og laing kapakyasan,” matud ni Shane.

Giukoban ni Art ang mga ngabil sa iyang bag-ong girlfriend. Nahimo nga daw paraiso alang kanila ang Plaza Independencia.

“Dili ba peligro dinhing dapita Art?” may kabalaka ang tingog sa dalaga nga gihikap sa aping sa iyang boyfriend. “Duol ra gikan dinhi ang police station,” ni Arthur. Mga alas 11 na sa gabii nga gihatod ni Art si Claire sa gipuy-an niini sa dalan Bonifacio. May kandado ang pultahan sa kuwarto. “Wala pa ang imong mga kauban?” ni Art.

“Ako ra karon dinhi kay mipauli ang duha nako ka room mates,” ni Shane. (Sumpayan)