May gitago ang kangitngit - Gula 72

Giingnan ni SPO1 Nicko Bernal ang iyang hepe nga mituo g’yud siya nga kadtong babaye nga nanawag kaniya mao g’yud ang lider sa Bangkulisan Black Brotherhood.

“Well, we have nothing to lose kun atong tuohan nga kadtong maong babaye maoy pangulo sa kulto. Gusto ko nga himoan mo kini og dugang pakisusi, Nicko.”

“Yes sir,” pasalig ni Nicko.

Mibalik si Nicko sa iyang opisina ug gipatawag niya sila si PO3 Canares, PO1 Rudy Alarcon ug PO1 Reuben Lebra. Gitug-anan niya ang tulo mahitungod sa iyang nasayran.

Si Rudy ug Reuben naglisod sa pagtuo apan lahi ang pangagpas ni Roy. Dihang nananghid na sila si Rudy ug Reuben nga mogawas na sa buhatan ni Nicko, nagpabilin si Roy.

‘Ato ra ni sir, ha,” nagkanayon si Roy.

“Ngano man diay, Roy?” nakapangutana si Roy.

“Kun tinuod nga usa ka babaye ang pangulo sa kulto, may gikatahapan ko.”

“U-unsa?” mikunot ang agtang ni Nicko.

“Ambot lang kaha, sir,” ni Roy. Posible nga sayop ang akong pangagpas pero nagduda ko ni Mrs. Biangca Tommi,” ni Roy.

“K-kadtong magtutudlo sa labing ulahi nga bata nga gipatay?” ni Nicko. “Oo, Sir, dili ba siya man ang labing ulahing nakit-an nga gikakuyog sa bata sa buhi pa kini?,” dugang ni Roy. (Sumpayan)