Tilaw sa tam-is

Gula 14

Nakahukom na g’yud si Shane nga tug-anan niya si Arthur sa iyang kaagi.

“Nagkasabot na unta kami nga magminyo ug sa akong boyfriend, apan kalit lang siya nga nausab diha nga may nakaila siya nga babaye nga bag-ong kawani sa ilang kompaniya,” matud ni Shane.

Luhaan ang mga mata ni Shane dihang misugod na siya sa pagsaysay sa iyang kaagi.  Gialam-alaman siya ni Arthur pinaagi sa paghapuhap sa iyang abaga.

“Sige, isugilon pa kanako ang inyong kaagi Shane,” matud ni Arthur. Miginhawa og lawom si Shane. Gusto niya nga mohanggap og daghang hangin aron nga mapugngan ang grabe’ng kaguol.

“Ayaw siya kagul-i Shane, dili siya maoy gitagana sa Ginoo alang kanimo. Tingali, gitagana gayud kita sa usa’g-usa mao nga gibuwag niya ang inyong relasyon,” giingnan ni Arthur si Shane.

Wala motingog si Shane. Apan wala siya motukol diha nga anam-anam siya nga gigakus ni Arthur ug gihagkan. “I love you Shane,” matud ni Arthur nga migakus pag-ayo sa dalaga.

“Dili na ako angay kanimo Art. Nakuha na sa kanhi ko’ng boyfriend ang akong pagka babaye,” lughaw ang tingog ni Shane nga mura na usab og kahilakon.

Apan gipaabot na ni Arthur ang mao nga inpormasyon. Nakasabot na siya nga kini maoy gipasabot ni Shane nga uwahi na ang ilang panag-ilhanay kay may nahitabo na kaniya ug sa kanhi niini hinigugma.

“Wala akoy labot sa imong kaagi Shane. Ang ako mao ang umaabot, ang atong pagminahalay,” ni Arthur. Diha-diha, gigakus siya pag-ayo ni Shane samtang naghilak. (Sumpayan)