Tilaw sa katam-is

Gula 11

Nahibulong si Shane kun ngano nga gihatagan og pagtagad ni Arthur ang pagkanta niya sa Sayang ni Claire dela Fuente.

“Mura man gud og may kahulogan ang imong pagkanta sa Sayang,” ni Art nga mitutok ni Shane. Nakapahiyom si Shane nga mitutok usab kang Art.

“Ang tinuod, ganahan kaayo ko nimo Shane sukad pa sa una nako nga pagkakita diha nga nagkadungan kita sa pagpangaon sa usa ka kan-anan,” mura’g misugod na og arangkada si Art.

Ingon sa nag-abot ang mga kilay ni Shane nga nakadungog sa gipamulong ni Arthur. “Ang tinuod Art, mahadlok na ko nga makigrelasyon og lalaki kay human na ako napakyas,” ni Shane.

“Unya, ngano nga Sayang man ang gikanta nimo kagabii ug nasabtan nako nga mura’g gihatagan mo gayud og kinabuhi ang pagkanta niini,” pangutana ni Arthur.

Gi-deliver na ang gi-order nila nga pagkaon. “Mangaon usa ta Shane, unya na kita mag-estorya pag-usab,” giingnan ni Arthur ang dalaga, ug siya mismo ang mibutang og sabaw sa panaksan ni Shane.

Nakabantay si Arthur nga mitutok kaniya si Shane. “Caring ka man diay Arthur. Ingon usab kanimo ang akong boyfriend kaniadto, apan kalit lang siya nga nausab,” ni Shane nga mura’g kalit lang nasubo.

“Magsultihanay ta bahin niana inighuman nato og kaon. Mangaon usa ta,” matud ni Arthur. (Sumpayan)