Ang tulay nga abtanan

Wala’y tawo dinhi sa Sityo Magpuling nga wala makaila kang Osmundo kay siya mao man ang tigulang nga albularyo nga daghan na kaayo’g natambalan.

Pinaagi sa iyang tambal nga hidhiran lang og lana ang lawas sa masakiton, mabatyagan dayon sa iyang gitambalan nga medyo mawagtang ang sakit o balatian nga giantos sa masakiton.

Usahay, tuthoan lang gani ni Osmundo ang masakiton nga magpatambal kaniya ug mamaayo kini dayon. Ngilngig g’yud og abilidad kini si Osmundo.

Apan adunay tabitabi nga migawas nga mao kuno nga ngilngig sa panambal kini si Osmundo kay mao kuno’y gibinlan sa lana sa mangtas nga ungo nga si Rufino sa dayong pagkamatay.

Napusilan si Rufino apan wala dayon kini mamatay sa bala, naabtan pa kini’g dugay. Ug kay suod sila si Osmundo ug Rufino mao nga siya ang gibinlan sa mga binotelya nga lana. Karon ngilngig na nga albularyo si Osmundo.

“Dunay nakakita kang Osmundo, bay Isyong nga nagtuwad sa may tulay,” matud ni Andres.

“Yamat ra, ungo diay na si Osmundo, bay Andres? Unya unsaon man ang iyang pagpanambal?” ni Isyong pa nga gibati’g panglimbawot sa iyang balhibo.

“Mao na diha ang problema kay daghan gihapon ang magpatambal kaniya, sige lang, kay ugma sa gabii, kuyog ta, atong atngan si Osmundo sa tulay ug atong patyon,” matud ni Andres.

“Patyon g’yud, di kaha ta madaot ana, bay. Makasohan unya ta og murder,” ni Isyong.

“Aw, kana kun dunay makakita, pero, kun wala, ang mahitabo nga si Osmundo gipatay ug wala mailhi nga tawo,” mipahiyom si Andres.

Apan ang tinuod nga rason ni Andres nga patyon si Osmundo kay naglagot siya niini kay si Inang, ang guwapa nga anak nilang Tito ug Inyang, naibog kang Osmundo. Si Andres may hilom nga gugma kang Inang.

Tuod, usa ka mingaw na nga gabii, ilang nakita si Osmundo nga mipaingon sa tulay. Dihadiha, nakita nila ni Andres ug Isyong nga mituwad kini.

Ug ila dayon kining gidasmagan aron tigbason, apan kalit kining mitindog ug miingon, “He, he, he, nasayod ko nga ikaw Andres ang mipusil kang Rufino kay uyab sila ni Inang.

Karon, ipanimalos ko ang akong amigo. Patyon ta ‘sab ka.”

Ug gidasmagan ni Osmundo sila si Andres ug Isyong. Gipaak ang ilang mga liog ug gisuyop ang ilang dugo. Unya mitingog ang wakwak. (Kataposan)