Tilaw sa katam-is

Gula 8

Wala lang magpasabot si Arthur ngadto kang Shane nga natingala siya ngano nga mikanta’g Sayang ang dalaga. Gitiwas nila og inom ang nahabilin nila nga light beer.

Wala pa’y tungang gabii sa ilang pagpamauli. Tagsa-tagsa nga gipanghatud ni Art ang duha ka dalaga. Una nga gihatud ni Art si Lorena kay sa Urgelio Street ra man ang iyang gipuy-an samtang si Shane sa Tejero.

“Dugay ka na ba nga nagpuyo dinhi sa Barangay Tejero, Shane?” gipangutana ni Art ang dalaga nga didto naglingkod sa luyo’ng bahin sa taxi. “Oo. Konsehal man ang akong papa kaniadto,” matud ni Shane.

Sudlonon pa ang panimalay nila ni Shane mao nga gimandoan ni Arthur ang drayber sa taxi nga mosulod niadtong gamay’ng karsada.

“Diritso na lang Art, makatuyok ra man ang taksi sa unahan. Kana maoy among balay o, tupad sa ila ni Konsehal Garry Lao,” ni Shane pa, dungan sa pagtudlo sa usa ka balay.

Nanaog si Art, apan wala niya bayari ang taxi kay mosakay ra siya pagbalik. “Sige, good night Shane. Take care,” matud ni Arthur, dungan sa pagpig-it niya sa kamot sa dalaga.

Misakay pagbalik si Art sa taxi diha nga milakaw na si Shane paingon sa balay nga iyang gitudlo. Nagpahatod si Art sa iyang gipuy-an sa Barangay Guadalupe.

Pag-abot niya sa balay, mihigda dayon si Arthur. Nanumbalik sa iyang kaisipan ang pagkanta ni Shane sa awit ni Claire dela Fuente nga Sayang. (Sumpayan)