Wa sugta sa pagpanguyab

Dear Tita Salie,

Ako diay si Juan, usa sa imong avid reader sa Pasabta Ko. Tita Salie, naa ko’y gipanguyaban nga wa g’yud ko sugta. Tingali basin nahadlok siya pagsugot nako kay duna man gud ko’y deperensiya sa panglawas. Palihog pasabta ko, Tita Salie, kun angay pa ba ko nga molaom?

Good Day Juan,

Kun ikaw nag-eskuyla, unya gusto ka gayud nga makahuman sa imong tinguha nga pangandoy sa kinabuhi, dili ba maayo nga buhaton nimo ang tanan bisan pa og daghang babag aron ka g’yud molampos? Dobleha pa ang imong paningkamot. Ayaw problemaha ang imong deperensiya sa panglawas kay kitang tanan aduna man g’yuy tagsa-tagsa ka mga apan. Tungod kana kay dili kita hingpit ingon man napanunod nato ang mga sala sa atong una’ng ginikanan maong kita masakit. Ang Roma 5:12 nag-ingon, “mao nga, ingon nga ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.” Busa, kitang tanan masakit gayud. Wala’y tawo nga exempted niini. -- Tita Salie