May gitago ang kangitngit
Gula 60
Gituman nila ni SPO1 Nicko Bernal ang sugo sa ilang hepe nga si Chief Inspector Dindo Raval. Gikuyog niya sila si PO3 Roy Canares, PO1 Rudy Alarcon ug PO1 Reuben Lebra pag-adto sa Barangay Maslog nga may napalgan na usab nga bata nga gipatay.
Gisugat sila sa barangay kapitan. Giubanan sila sa basakan nga didto gilabay ang patay’ng lawas sa bata. Nasayran nila ni Nicko nga ang bata natawo usab sa Septiyembre 8.
Wala’y laing gipasanginlan ni Nicko nga responsable sa krimen -- ang kulto nga Bangkulis Black Brotherhood.
Gisukitsukit ni Nicko ang mga ginikanan sa bata nga gipatay. Mitug-an kaniya ang magtiayon nga kagabii wala na mahiuli ang bata gikan sa eskuylahan.
Nagpangutana usab si Nicko sa ubang mga tawo nga kataposang nakakita sa bata sa buhi pa. May nakasulti kang Nicko nga kagahapon sa hapon nakita niini ang bata nga mikuyog sa iyang maestra nga si Biangca Tommi.
“Maayo tingali nga pakigkitaan usab nato ang maestra nga si Mrs. Tommi, sir, kay basin og may ikatug-an usab siya nga kasayoran nga makatabang sa atong imbestigasyon,” matud ni PO3 Cañares.
“Husto ka, Roy,” ni Nicko pa. (Sumpayan)
- Latest
